बेनी अस्पतालमा शल्यक्रियामार्फत गरिने प्रसूति सेवा बन्द : चार जिल्लाका गर्भवती समस्यामा

म्याग्दी । प्रदेश सरकारले समयमा चिकित्सकका व्यवस्थापनमा ध्यान नदिँदा जिल्ला सदरमुकाममा रहेको प्रादेशिक अस्पताल बेनीमा स्त्री तथा प्रसूतिरोग विशेषज्ञ नहुँदा शल्यक्रियामार्फत गरिने प्रसूति सेवा बन्द भएको छ ।

अस्पतालको तथ्याङ्कअनुसार वार्षिक एक सय २० देखि एक सय ५० गर्भवतीले शल्यक्रियामार्फत गरिने प्रसूति सेवा लिँदै आएका छन् । यसबाट म्याग्दी ,मुस्ताङ सहित पर्वतको जलजला, बागलुङको ताराखोलाका सेवाग्राही समस्यामा परेका छन् ।

जिल्लाको एकमात्र अस्पतालमा कार्यरत चिकित्सकले कात्तिकमा राजीनामा दिएर गएपछि अब प्रसूति सेवा लिन बागलुङ र पोखरा जानुपर्ने बाध्यता सृजना भएको हो । प्रसूति ब्यथाले छटपटिएका गर्भवतीलाई बागलुङ र पोखरा पुर्याउनुपर्ने अवस्था आएको अन्नपूर्ण गाउँपालिका–४ का प्रेम गुरुङले गुनासो गरे ।

“विशेषज्ञ चिकित्सक नभएकाले उपचार सम्भव नहुने जनाउँदै पठाएपछि बागलुङ लैजान बाध्य भए”, उनले भने, “प्रसूति सेवाका लागि जिल्लाबाहिर जानुपर्दा समय र आर्थिक भार बढेको छ ।” गुरुङले श्रीमतीलाई प्रसूति गराउन बागलुङ लैजानु परेको गुनासो गरे।

केही वर्ष अगाडि धवलागिरि अस्पताल बागलुङ र पर्वत जिल्ला अस्पतालले समेत पोखरा रिफर गरेको गर्भवतीको बेनीमा सफल शल्यक्रिया भएको थियो । बेनी अस्पतालका निमित्त प्रमुख डा रामु सापकोटाले स्त्री तथा प्रसूति रोग विशेषज्ञ नहुँदा सेवा प्रवाहमा समस्या भएको बताए।

“हामीले गरेको विज्ञापनमा कोही आउनुभएन”, उहाँले भन्नुभयो, “प्रदेशको स्वास्थ्य मन्त्रालयमा समस्याका बारेमा जानकारी गराए पनि हालसम्म चिकित्सक आएका छैनन् ।” ‘निक साइमन इस्टिच्युट’को सहयोगमा २०७१ सालदेखि बेनी अस्पतालमा शल्यक्रियामार्फत गरिने प्रसूति सेवा सुरु भएको थियो । दाताको कार्यक्रम सकिएपछि यो कार्यक्रमलाई प्रदेश सरकारले निरन्तरता दिँदै आएको छ ।

जनशक्ति अभावमा हाल हाडजोर्नी तथा नशारोगबाहेक अन्य शल्यक्रिया सेवा पनि बन्द भएको छ । गत भदौदेखि बेनीलगायत गण्डकी प्रदेश सरकारमातहतका अस्पतालको व्यवस्थापन समिति नेतृत्वविहीन छ । सम्बन्धित जिल्लाको समन्वय समितिका प्रमुख समितिको अध्यक्ष रहने कार्यविधि खारेज भएपछि अस्पतालहरू नेतृत्वविहीन भएका हुन् ।

थप समाचारहरु

मुटु जोगाऔ, नुनको मात्रा घटाऔं नेपाल आँखा अस्पतालमा एक घण्टाभित्र विरामीको उपचार स्वास्थ्यसम्बन्धी सबै विवरण उपलब्ध हुने प्रणाली लागू गर्ने तयारी आयोडिनयुक्त नुन सम्बन्धी ऐन कार्यान्वयनमा औलोको जोखिममा कञ्चनपुर विश्व हात स्वच्छता दिवस सम्पन्न कुष्ठरोग उल्मूलन चुनौतीपूर्ण  महिनावारी स्वच्छता दिवसमा एक्स-पोज नेपालले गर्याे साइकल र्‍याली  फोहरको स्रोतमा वर्गीकरण नहुँदा समस्या नागरिक कल्याण समाज नेपालको आयोजना बृहत ‘रक्तदान’ कार्यक्रम सम्पन्न चितवनको मह पौष्टिक तत्त्वले भरिपूर्ण संघको आह्वानमा चिकित्सकहरु आन्दोलनमा, आकस्मिक बाहेकका सम्पूर्ण सेवा बन्द छ करोड लागतमा अस्पताल भवन निर्माण २० वर्षमा विवाह गरेर ३० वर्षभित्र सन्तान जन्माउनुस् : प्रधानमन्त्री महेन्द्रनगर आँखा अस्पतालमा भारतीय विरामीको आकर्षण बढ्दै पच्चीस वर्षपछि क्यान्सर अस्पतालका भवनको नक्सापास इकेबा डेन्टल क्लिनिकमा निशुल्क दन्त परिक्षणसेवा बजेट अभावमा अलपत्र अस्पताल