शेयर बजार आज पनि दोहोरो अंकले बढ्यो

काठमाडौं ६ फागुन २०८१ । शेयर बजार आज पनि दोहोरो अंकले बढेको छ । नेपाल स्टक एक्सचेञ्ज लिमिटेड (नेप्से) का अनुसार आज बजार १२.६८ अंकले उचालिएको हो । ०.४६ प्रतिशतले बजार बढ्दा नेप्से परिसूचक २७४०.५९ अंकमा पुगेको छ । समग्रमा बजार उचालिए पनि विकास बैंक, फाइनान्स, होटल, उत्पादनमूलक, लघुवित्त र म्युचुअल फण्ड भने घटेका छन् । बाँकी अरु समूहमा हरियाली छाएको छ ।

३ सय १४ कम्पनीका १ करोड ८२ लाख ३० हजार ३ सय २ कित्ता शेयर किनबेच हुँदा आज १० अर्ब ४३ करोड ७० लाख ६ हजार २ सय १४.८२ रुपियाँ बराबरको कारोबार भएको छ । आज विभिन्न ५ कम्पनीका लगानीकर्ताहरुले ९ प्रतिशत बढी नाफा कमाएका छन् । सप्तकोशी डेभलपमेन्ट बैंक र कुमारी बैंकको ऋणपत्रका लगानीकर्ताहरुले भने १०, १० प्रतिशतले घाटा व्यहोरेका छन् ।

आज हिमालयन रि–इन्स्योरेन्सको उच्च कारोबार भएको छ । उक्त कम्पनीको ८२ करोड २ लाख ३६ हजार ९ सय १०.२० रुपियाँ बराबरको शेयर किनबेच भएको छ । त्यस्तै दोस्रोमा नेपाल रि–इन्स्योरेन्सको ५१ करोड ६८ लाखको शेयर किनबेच भयो ।