कविता – बाल संज्ञान 

उमङ्ग शाह

ललितपुर - आजको खल्लो दृश्यमा ती रङ्ग नै कहाँ छन् र!
इन्द्र धनुषका गोरेटामा हिँड्दा त कहिले पातालका गहिराइ नाप्दा,
निश्चल निष्कपट मुस्कान बोक्दै बालखामा चाखेको ब्रह्माण्डको स्वाद!

आजको हल्लामा त्यो मौनता नै कहाँ छ र !
चमत्कारी ती शब्द जसलाई कुनै अर्थ चाहिन्नथ्यो,
केही डर अनि हजारौँ निशब्द सपना बोक्दै,
दीक्षा बिनै उब्जिएका ती प्रेमभाव !

आजको सत्यतामा त्यो निष्ठा नै कहाँ छ र !
सुनकेस्री कपाल, कैयौँ चमत्कार सुन्दै,
वायुपंखी अश्व चढी अनेक लोक घुम्दै,
मिथ्या समेत चोख्याउने ती नि:शर्त साथ !