मौनताको पिण्ड

ललितपुर - मेरा बाको मौनता गल्ती अनि कमजोरी थिएन
आज बुझ्दैछु उनको मौनतामा झुट पक्कै थिएन
स्वीकार्छु, मैले बुझ्न अनि उनले बुझाउन नसकेकै हो
तर उनको आक्रोशमा पक्कै कमजोरी बाहेक केही थिएन ।

बा ! आज म इतिहासका पाना पल्टाउँदै छु
अनि खोज्दैछु तिम्रो कमजोरी कहानेर थियो भनेर
यस धर्तीमा रहुन्जेल तिमीले कहिल्यै बुझेनौ बा !
कमजोरी लुकाउन नजान्नू नै कमजोरी हो भनेर ।

तिम्रा मौनतालाई हतियार बनाएर मार हान्नेहरु
आज तँछाड मछाड गर्दै परेड खेलिरहेछन्
आफ्ना गल्ती र कमजोरीलाई छपक्क पारेर
सत्यतालाई लत्याएर मौनताको पिण्ड खाइरहेछन्

बा ! मलाई तिम्रा पाइलाहरु पछ्याउन मन छ
तिमी जस्तै मौनतामै हराउन अनि बिलाउन मन छ
तर ठूलो हुँकारले आफ्ना कुकर्म ढाक्नेहरुको अगाडि
मेरो मौनता अनि धैर्यता टिक्ला या नटिक्ला ।

यहाँ त झुट र कमजोरी लुकाउन जान्नु पर्दोरहेछ
त्यो चाहिँ सकूँला नसकूँला, समयले देखाइदिनेछ
सत्यतालाई पछ्याइरहँदा सबैका आँखा बिझ्ने रैछ बा !
बिझे बिझोस् तर म सत्यकै बाटोमा अडिग रहेनछु ।