ललितपुर महानगरपालिका वडा नं. २९ हरिसिद्धिको आँखा तथा कान उपचार केन्द्रको औपचारिक उद्घाटन शनिवार हुने 

ललितपुर । ललितपुर महानगरपालिका वडा नं. २९ हरिसिद्धिमा सञ्चालनमा आउन लागेको आँखा तथा कान उपचार केन्द्रको आउँदो शनिवार उद्घाटन हुने भएको छ । ललितपुर महानगरपालिका, वडा नं. २९ र नेपाल नेत्र ज्योति संघ, सगरमाथा चौधरी आँखा अस्पताल, लहानबीच गत बर्ष भएको सम्झौता अनुसार ललितपुर महानगरपालिका, २९ नं. वडामा उक्त आँखा तथा कान उपचार केन्द्र सञ्चालन हुन लागेको हो ।

उक्त आँखा तथा कान उपचार केन्द्रको नाम जलः आँखा तथा कान उपचार केन्द्र रहने छ । जलः आँखा तथा कान उपचार केन्द्रको उद्घाटन ललितपुर महानगरपालिकाका प्रमुख  चिरीवावु महर्जनले गर्ने  २९ नं. वडाका वडाध्यक्ष गणेश कुमार महर्जनले बिजनेस पाटीलाई जानकारी दिए ।

उदघाटन पछि आँखा तथा कान उपचार केन्द्रबाट नियमित सेवाहरूको सुरूवात हुनेछन् । यसले हरिसिद्धि क्षेत्र, यसका आसपासका क्षेत्रका साथै पुरै ललितपुर महानगरपालिकाका बासिन्दाहरूलाई आँखा तथा कान उपचारको लागि निकै सहज हुने समेत वडा अध्यक्ष गणेश कुमार महर्जनले  जानकारी दिए ।।

उपचार केन्द्रले आँखा तथा कानका विभिन्न रोगहरूको जाँच, परामर्श उपचार साथै औषधि तथा चश्मा सुपथ मूल्यमा उपलब्ध गराउने छ । त्यसैगरी मधुमेह तथा उच्च रक्तचाप भएका बिरामीहरूको पर्दाको जाँच, आँखाको प्रेसर तथा नली जाँच, मोतीबिन्दु तथा जल बिन्दु भएका बिरामीलाई जाँच गरी परामर्श दिने र आवश्यकता अनुसार समय-समयमा आँखाको शिविर सञ्चालन तथा शल्य चिकित्सा सेवा समेत प्रदान गर्नेछ ।
सगरमाथा चौधरी आँखा अस्पताल, लहानको आफ्नो सेवा देशैभरी बिस्तार गर्ने उद्देश्य अनुरूप ललितपुर महानगरपालिका, वडा नं. २९ हरिसिद्धिमा आँखा तथा कान उपचार केन्द्र स्थापन हुन लागेको हो । ललितपुर महानगरपालिका २९ नं. वडाको आयोजनामा सगरमाथा चौधरी आँखा अस्पतालले दुई पटक हरिसिद्धिमा बृहद् निःशुल्क शल्यक्रिया सहितको आँखा शिविर सफलतापूर्वक सञ्चालन गरेको थियो ।