सुनचाँदी व्यवसायीको संरक्षण गर्न सरकारले कर प्रणाली चुस्त बनाउनु पर्नेमा जोड

ललितपुर । सोमबार बसेको अर्थसमितिको बैठकले सुनचाँदी व्यवसायीको संरक्षण गर्न सरकारले कर प्रणाली सुस्त बताउनु पर्नेमा जोड दिएको छ । आगामी आर्थिक वर्षमा सरकारले घोषणा गरेको विलासिता कर र व्यवसायीहरुले गरेको विरोधका बारेमा सोमबार सिंहदरबारमा बसेको अर्थ समितिको बैठकले सरकारलाई कर प्रणाली चुस्त बनाउ निर्देशन दिएको छ ।

नेपाल सुनचाँदी व्यवसायी महासङ्घले आगामी आर्थिक वर्ष २०८२/८३ को बजेटमार्फत सुन तथा गरगहनामा शून्यबाटै कर लाग्ने गरी भएको घोषणा फिर्ता लिन माग गरेपछि सो विषयमाथि प्रतिनिधिसभा, अर्थ समितिको आजको बैठकमा छलफल भएको थियो ।

सुनचाँदी व्यवसायीले महासंघले सुन जन्मदेखि मृत्यपछिको संस्कारमासमेत आवश्यक पर्ने हुँदा यसलाई विलासिताका रूपमा नहेरी संस्कार, संस्कृति र सम्पतिका रूपमा बुझिदिन सरकारलाई सुझाव दिएको छ ।

समितिको तर्फबाट निर्देशन दिँदै समितिका सभापति सन्तोष चालिसेले अरू देशमा बजार नजाने गरी उद्योगी व्यवसायीको संरक्षण गर्ने गरी यसलाई सम्पूर्ण रुपमा शुद्धीकरण गर्नुपर्ने बताए । व्यवसायीहरुलाई यस पेसाबाट पलायन हुने बतावरण नबनाउन सरकारको ध्यानाकर्षण गराउँदै उद्योगी व्यवसायी बाँकी रहेमात्रै कर उठ्छ र उद्योगी व्यवसायीको संरक्षण गर्ने किसिमको नीति अहिलेको आवश्यकता रहेको बताए ।

यस्तै, महासङ्घका अध्यक्ष अर्जुन रसाइलीले सुन र गहनामा विभिन्न नाममा ३० प्रतिशतसम्म कर लाग्ने व्यवस्थाले नेपाली व्यवसाय धरासायी हुने बताएका छन् । उनले अहिलेकै घोषणा कायम रहेमा नेपालमा सुन महँगो भई उपभोक्ता मारमा पर्नुका साथै हजारौँ मजदुरको रोजगारी गुम्न सक्नेतर्फ सचेत रहन आग्रह गरे । खुला सिमाना भएका कारण भारतीय बजारमा पुगेर सहज सुन किन्न वातावरणले राज्यको ठूलो परिमाणमा राजस्व गुम्न सक्ने पक्षमासमेत सजग रहन जरूरी रहेको व्यवसायीको भनाइ थियो ।

चालु आर्थिक वर्षमा करिब १० लाखसम्म सुन खरिदमा अतिरिक्त कर लाग्ने व्यवस्था रहेकामा यस पटकको बजेटमा शून्यबाटै कर लाग्ने प्रावधान रहने प्रस्ताव गरेको छ । नेपाल सुन चाँदी व्यवसायी तथा कालीगढ सङ्घर्ष समितिका विपेन्द्र रामुदामु सुनचाँदी व्यवसायीलाई राज्यले हर्ने र दृष्टिकोणमै परिवर्तन आउन आवश्यक रहेको बताए । नेपालको सुनचाँदी व्यवसायलाई मर्यादित तुल्याउन सहजरूपमा कच्चापदार्थ प्राप्तिको व्यवस्था हुन आवश्यक रहेको बताउँदै उनले सुनचाँदीलगायत रत्न सुन्दरताका लागि मात्र नभइ अप्ठेरो परेका बेला खर्च गर्ने वस्तुका रूपमा बुझिदिन सुझाव दिए।

नेपाल राष्ट्रिय सुनचाँदी व्यवसायी महासङ्घका अध्यक्ष अर्जुन विश्वकर्माले मुलुकको व्यापार घाटालाई सन्तुलित तुल्याउन महत्त्वपूर्ण भूमिका खेलेको सुनचाँदी व्यवसायले १२ अर्ब बराबरको राजस्वमा योगदान दिँदैआएको जानकारी दिए। नेपालमा सुनचाँदी रत्न तथा आभूषणका क्षेत्रमा चार खर्बभन्दा बढीको लगानी रहेको बताउँदै उनले नेपालबाट वार्षिकरूपमा चार अर्बभन्दा बढीका गरगहना निर्यात हुँदैआएको तथ्याङक प्रस्तुत गरे ।

सुनचाँदी व्यवसाय विस्तारका लागि आवश्यक वातावरण बनाउनुपर्ने, कच्चा पदार्थमा पहुँच विस्तार हुनुपर्ने तथा सङ्कटबाट गुज्रिरहेको व्यवसायलाई सान्त्वना दिन अन्य नीतिगत व्यवस्था घोषणा हुनुपर्ने व्यवसायिको माग छ । नेपाल सुनचाँदी व्यवसायी महासङ्घका प्रतिनिधि दिपेशरत्न शाक्यले नेपाली समाजका संस्कारसँग जोडिएको तथा महत्त्वपूर्ण नगद सम्पतिकारूपमा रहेको सुनचाँदीका गरगहना जहिले पनि निर्यातको सम्भावना बोकेको बस्तु भएकाले यस व्यवसायको संरक्षण र प्रवद्र्धनमा सरकारको ध्यान जान आवश्यक रहेको बताएका छन् ।

बैठकमा सदस्यले अहिले घोषणा गरिएको करले सुनचाँदी व्यवसाय मात्र नभइ नेपाली उपभोक्तालाईसमेत मर्का परेकाले त्यसमा सरकारको सहजीकरणको आवश्यकता औँल्याए। उनीहरुले अत्यधिकरूपमा बढाइएको करले व्यवसाय सञ्चालनमा अप्ठेरो सिर्जना हुने र उपभोक्ता बढी मारमा पर्ने पाटोमा हेक्का राख्न सरकारलाई सुझाव दिए।

यसअघि आन्तरिक राजस्व विभागका उपमहानिर्देशक तीर्थराज सिल्वालले सुन कालोधनको सञ्चयको क्षेत्र भन्ने प्रश्न उठेपछि त्यसलाई नियमन गर्न र पारदर्शी तुल्याउन करलगायत विषयमा नयाँ व्यवस्था गरिएको बताउनुभयो । उनले भने, “नेपालमा बैंङ्किङ माध्यमद्वारा छ प्रतिशत मात्र सुनको कारोबार हुन्छ, अरु विभिन्न पक्षबाट करोबार हुन्छ । झोलामा पैसा बोकेर सुन भण्डारण गर्ने कार्यलाई रोक्न सरकारले सारेको अभियानमा सहयोग होस् ।” अर्थ समितिले विभिन्न माग राखेर आन्दोलनमा रहेका सुनचाँदी व्यवसायिका विषयमा छलफल गर्न आजको बैठक बोलाएको हो ।

थप समाचारहरु

सुनको मूल्यले बनायो नयाँ रेकर्ड अप्रत्यासित रुपमा महंगियो सुन, कतिमा हुँदैछ कारोबार ? घट्यो सुनको मूल्य, आज कतिमा हुँदैछ कारोबार ? सुन–चाँदीको मूल्यमा निरन्तर गिरावट घट्यो सुन–चाँदीको मूल्य, कतिमा हुँदैछ कारोबार ? सुनको मूल्यमा सामान्य गिरावट सुनको मूल्यमा नयाँ रेकर्ड कायम सुन तोलामा ७ हजार ५०० ले सस्तियो सुन–चाँदीको मूल्यमा सामान्य गिरावट सुनको मूल्यमा सामान्य वृद्धि सुनको मूल्यमा सामान्य वृद्धि, चाँदी स्थिर सुनको मूल्यमा सामान्य वृद्धि सुनको मूल्यमा भारी वृद्धि, कतिमा हुँदैछ कारोबार ? सुनको मूल्य १ लाख ९१ हजारभन्दा माथि सुनको मूल्य तोलाको दुई लाख नजिक सुनको मूल्यमा सामान्य गिरावट, कतिमा हुँदैछ कारोवार ? सुनको मूल्यमा भारी वृद्धि सुनचाँदी व्यवसायीको राष्ट्रिय भेला, आन्दोलन रोक्न प्रधानमन्त्रीको आग्रह