मूल्यको प्रतीक्षामा बोटमै कुहिँदै जुनार

ललितपुर – रामेछाप नगरपालिका–७ ओख्रेनीका जुनार कृषकहरू अहिले जुनारको उचित मूल्य कहिले पाइनु होला भन्ने चिन्तामा छन् । अघिल्ला वर्षको तुलनामा यस वर्ष जुनार उत्पादन केही घटे पनि बेमौसममा बिक्री गर्दा राम्रो भाउ पाउने आशाले अधिकांश कृषकले अझै जुनार र सुन्तला बोटमै राखेका छन् ।

सामान्यतया मङ्सिरदेखि माघको पहिलो हप्तासम्म जुनार टिप्ने समय भए पनि ओख्रेनीका धेरै कृषकले मूल्य बढ्ने अपेक्षामा बगैँचामै फल राखेका हुन् । करिब पाँच सय बोटमा फल लागेको आफ्नो बगैँचाको जुनार राम्रो मूल्य पाएपछि मात्रै बिक्री गर्ने सोचमा रहेको स्थानीय कृषक हिमाल तामाङले बताउनुभयो । उहाँका अनुसार अहिले चुनावको चहलपहलभन्दा पनि बोटमा पाकिरहेको जुनारको मूल्यको चिन्ताले आफूहरूलाई बढी सताइरहेको छ ।

यस वर्ष असोज र कात्तिकमा परेको निरन्तर वर्षाका कारण जुनार उत्पादनमा केही गिरावट आएको कृषकहरू बताउँछन् । गत मङ्सिर–पुसतिर बगैँचाबाट बिक्री गर्दा प्रतिकिलो ५० रुपैयाँ मात्रै पाएको तर अब जुनारको दानाको आकार हेरेर ६० देखि ९० रुपैयाँसम्म मूल्य पाउन सकिने स्थानीय कृषक दिलमाया तामाङले जानकारी दिनुभयो । उहाँले मूल्य अझै बढ्ने आशामा जुनार नटिपेको भए पनि अब भने प्रतिकिलो ६०–७० रुपैयाँमा बिक्री गर्ने तयारीमा रहेको बताउनुभयो ।

जुनारले बिरुवा रोपेको दुईदेखि तीन वर्षमै उत्पादन दिन सुरु गर्ने गर्छ । जुनार बगैँचामा भटमास, लसुन, प्याज, काउली, बन्दाजस्ता तरकारी तथा कोसेबालीसमेत लगाएर कृषकहरूले दोहोरो आम्दानी लिँदै आएका छन् । सिजन सकिएपछि बिक्री गर्दा राम्रो मूल्य पाइने अपेक्षाले आफूले पनि अहिलेसम्म जुनार नबेचेको अर्का कृषक गिरीराज तामाङले बताउनुभयो । हाल जुनारबाट जाम, जुस तथा विभिन्न पेयपदार्थ उत्पादन गरी बिक्री गर्ने अभ्यास पनि बढ्दै गएको छ ।

जुनारको बजारको खासै समस्या नरहेको रामेछाप नगरपालिका–७ सुकाजोरका कृषक रामकुमार कार्कीको भनाइ छ । यद्यपि जुनार जोन समन्वय समितिका प्राविधिकका अनुसार माघको अन्तिम सातादेखि फागुनको पहिलो सातासम्म जुनार फुल्ने समय भएकाले मूल्यको आशामा लामो समयसम्म बोटमै फल राख्नु उपयुक्त हुँदैन । बोटमै जुनार राख्दा अर्को वर्षको फूलमा असर पर्ने भएकाले समयमै टिपेर चिस्यान गृहमा भण्डारण गरी बिक्री गर्दा कृषकलाई बढी फाइदा हुने जुनार जोन समन्वय समितिका अध्यक्ष गुञ्जबहादुर कार्कीको सुझाव छ ।

राष्ट्रिय कृषि आधुनिकीकरण कार्यक्रम कार्यान्वयन एकाइ रामेछापले मन्थली, रामेछाप नगरपालिका र लिखु तामाकोशी गाउँपालिकालाई जुनार जोनका रूपमा विकास गर्न विभिन्न कार्यक्रम सञ्चालन गर्दै आएको छ । गत आर्थिक वर्ष २०८१/८२ मा जिल्लामा ५८० हेक्टर क्षेत्रफलमा जुनार खेती गरिएकोमा चालु आर्थिक वर्षमा उक्त क्षेत्र विस्तार भई ६८० हेक्टर पुगेको नायब प्राविधिक सहायक भवानी बस्नेतले जानकारी दिनुभयो । उहाँका अनुसार प्राविधिक दृष्टिले माघ–फागुनसम्म जुनार बोटमै राख्नु उपयुक्त मानिँदैन ।

हरेक जुनार उत्पादन हुने टोलमा शीत भण्डारणको व्यवस्था गरी सिजनमा त्यहाँ जुनार राख्ने र बेमौसममा बिक्री गर्न सकिए कृषकहरूलाई थप लाभ पुग्ने स्थानीय लोकेन्द्र श्रेष्ठको भनाइ छ ।

थप समाचारहरु

यातायात व्यवस्था विभाग: चालकलाई १ वर्षका लागि परीक्षणकालीन लाइसेन्स दिने तयारी भारतमा कोरोनाको संक्रमण व्यापक, अस्पतालमा शैया र औषधि नपाएर मृत्यु हुनेको संख्या बढ्दो यस्तो छ आज सागसब्जी र फलफूलको मूल्य अनुदान दिएर उद्यम प्रोत्साहन गर्दै सूर्योदय नगरपालिका  ढाकावाङका किसानलाई मौरी वितरण    आजका लागि निर्धारित कृषिउपजको थोक मूल्यसूची आजका लागि निर्धारित कृषिउपजको थोक मूल्यसूची खरबुजा बिक्रीबाट दैनिक १२ हजारसम्म आम्दानी गर्दै किसान गाउँ–गाउँका किसानको पहुँचमा आधुनिक कृषियन्त्र चितवनको मकैमा अमेरिकन फौजी कीराको सङ्क्रमण रामेछापमा फौजी कीराको प्रकोप जुम्ला लगायत अन्य तीन जिल्लाका भेडापालकलाई गोठालो भत्ता काठमाडौँमा सुरुभयो म्याङ्गो फेस्ट– २०२५ देशभर धमाधम रोपाइँ जारी ‘धानबालीको प्रवर्द्धन गर्न सरकारले उच्च प्राथमिता दिएको छ, मन्त्री अधिकारी व्यावसायिक मौरीपालनमा किसान आकर्षित मुस्ताङमा यस वर्ष रु एक अर्बभन्दा बढीको स्याउ उत्पादन खोटाङमा ७० प्रतिशत धानबालीमा क्षति