बिजनेस पाटी
ललितपुर – तेहरानमा सम्भावित अमेरिकी सैन्य कारबाहीको आशङ्कामा भारत सरकारले आफ्ना नागरिकलाई इरान छोड्न औपचारिक सल्लाह दिएको छ ।
भारत सरकारको विदेश मन्त्रालयले भारतीय नागरिकलाई सतर्क रहन र उपलब्ध उडानमार्फत स्वदेश फर्किन आग्रह गरेको छ ।
तेहरानस्थित भारतीय दूतावासले सबै नागरिकलाई विरोध–प्रदर्शन हुने क्षेत्रबाट टाढा रहन, दूतावाससँग सम्पर्कमा रहन, र स्थानीय सञ्चारमाध्यमबाट अद्यावधिक सूचना लिन सल्लाह दिएको छ ।
विदेश मन्त्रालयका अनुसार इरानमा करिब १० हजार भारतीय नागरिक बसोबास गर्दै आएका छन् । हालको अस्थिर अवस्थाले उनीहरूको सुरक्षालाई प्राथमिकता दिनुपर्ने स्थिति सिर्जना गरेको छ ।
यो चेतावनी प्रधानमन्त्री नरेन्द्र मोदीको इजरायल भ्रमणअघि सार्वजनिक भएको हो । मोदीले इजरायलसँगको स्थायी मित्रतालाई भारतले गहिरो महत्त्व दिन्छ भन्ने उल्लेख गरेका छन् ।
भारतले रक्षा, कृषि, प्रविधि र सुरक्षा क्षेत्रमा इजरायलसँग सहकार्य विस्तार गर्दै आएको छ । त्यस्तै, खाडी राष्ट्रहरू र इरानसँग दीर्घकालीन रणनीतिक सम्बन्ध कायम राख्दै आएको छ । इरानको चाबहार बन्दरगाह विकासमा भारतको संलग्नता अफगानिस्तानसम्म व्यापारिक पहुँच विस्तार गर्ने योजनासँग जोडिएको छ ।
फेसबुकबाट तपाईको प्रतिक्रिया