ट्राफिक कारबाहीमा पाँचपटक पर्ने चालकको लाइसेन्स नै निलम्बन !

ललितपुर - काठमाडौं उपत्यकामा ट्राफिक नियम उल्लंघन दोहोर्‍याउने चालकविरुद्ध अब कडा कारबाही गरिने भएको छ । काठमाडौं उपत्यका ट्राफिक प्रहरी कार्यालयले एउटै कसुरमा पाँचपटकभन्दा बढी कारबाहीमा पर्ने चालकको सवारीचालक अनुमतिपत्र (लाइसेन्स) निलम्बन गर्ने प्रक्रिया अघि बढाएको हो ।

आइतबार (वैशाख २७) आयोजित कार्यक्रममा कार्यालयका प्रमुख एवं एसएसपी नवराज अधिकारीले ट्राफिक नियमको बारम्बार उल्लंघन गर्ने चालकलाई अब सामान्य जरिवानामै सीमित नराखिने स्पष्ट पारे । उनले भने, पटक–पटक कारबाहीमा परिराख्ने चालकको लाइसेन्स अब निलम्बन हुन्छ । हामीले यो प्रक्रिया अघि बढाइसकेका छौँ ।

ट्राफिक प्रहरीका अनुसार हालसम्म ३१ जना चालकको लाइसेन्स निलम्बनका लागि यातायात व्यवस्था विभागमा पठाइसकिएको छ । प्रारम्भिक चरणमा उनीहरूको लाइसेन्स ६ महिनाका लागि निलम्बन गर्न सिफारिस गरिएको एसएसपी अधिकारीले जानकारी दिए ।

चालु आर्थिक वर्षको चैत मसान्तसम्म काठमाडौं उपत्यकामा मात्रै तीन लाख ७३ हजार ५६२ सवारीसाधन ट्राफिक कारबाहीमा परेका छन् । ट्राफिक प्रहरीका अनुसार सवारीसाधनको अत्यधिक चापका कारण व्यवस्थापन चुनौतीपूर्ण बन्दै गएको छ ।

उपत्यका ट्राफिक प्रहरी कार्यालयको तथ्यांकअनुसार आर्थिक वर्ष २०८१/८२ सम्म ललितपुरस्थित यातायात व्यवस्था कार्यालयमा कुल २० लाख १८ हजार ४३४ सवारीसाधन दर्ता भएका छन् । तीमध्ये १६ लाख ५६ हजार ४८ वटा दुईपांग्रे सवारीसाधन रहेका छन् । यात्रुवाहक सवारीसाधन ४६ हजार ८४४, चारपांग्रे दुई लाख ९६ हजार ८६७ तथा १८ हजार ६७५ इलेक्ट्रिक गाडी दर्ता भएका छन् ।

दर्ता भएका सवारीसाधनबाहेक अन्य जिल्लाबाट दैनिक लाखौँ सवारी उपत्यकामा प्रवेश गर्ने भएकाले ट्राफिक व्यवस्थापन झन् जटिल बनेको ट्राफिक प्रहरीको भनाइ छ । हाल उपत्यका ट्राफिक प्रहरी कार्यालयमा एक हजार ११३ जनाको दरबन्दी भए पनि जनशक्ति अपुग भएपछि करिब ४०० जनालाई काजमा खटाइएको छ ।

काठमाडौं, ललितपुर र भक्तपुरमा ट्राफिक प्रहरीका कुल ७७ वटा युनिट सञ्चालनमा छन् । एउटा युनिटले औसतमा २६ हजारभन्दा बढी सवारीसाधनको व्यवस्थापन गर्नुपर्ने अवस्था रहेको छ ।

एसएसपी अधिकारीका अनुसार ट्राफिक प्रहरी दैनिक १० घण्टासम्म ड्युटीमा खटिने गरेका छन् । उपत्यकाका २८ स्थानमा २४ सै घण्टा ट्राफिक प्रहरी परिचालन गरिएको छ भने दैनिक ३२६ स्थानमा नियमित चेकजाँच सञ्चालन गरिन्छ । व्यस्त समयमा थप ९७ स्थानमा ट्राफिक व्यवस्थापन गरिन्छ भने क्यूआरटी टिममा ६२ जना ट्राफिक प्रहरी खटाइएका छन् ।

त्यसैगरी, उपत्यकाका ५६ स्थानमा रात्रिकालीन चेकिङ तथा ३६ स्थानमा आकस्मिक चेकिङ पोस्ट सञ्चालन हुने गरेको छ ।

सवारी दुर्घटनाको अवस्था पनि चिन्ताजनक रहेको ट्राफिक प्रहरीको तथ्यांकले देखाएको छ । चालु आर्थिक वर्षको चैतसम्म काठमाडौं, ललितपुर र भक्तपुरमा गरी चार हजार ६३१ वटा सवारी दुर्घटना भएका छन् । ती दुर्घटनामा १७४ जनाको मृत्यु भएको छ भने १८६ जना गम्भीर घाइते भएका छन् ।

दुर्घटनामा मृत्यु हुनेमध्ये १६ देखि ३५ वर्ष उमेर समूहका सबैभन्दा धेरै रहेका छन् । यो समूहका ८६ जनाले ज्यान गुमाएका छन् । त्यस्तै, ३६ वर्षभन्दा माथिका ८१ जना र १६ वर्षमुनिका सातजनाको मृत्यु भएको ट्राफिक प्रहरीको तथ्यांकमा उल्लेख छ ।

सवारी चोरीका घटनामा पनि वृद्धि देखिएको छ । ट्राफिक प्रहरीले आइतबार मात्रै चोरी भएका ६५ वटा दुईपांग्रे सवारीसाधन सम्बन्धित धनीलाई फिर्ता बुझाएको छ । वैशाख महिनाभर प्राप्त उजुरीका आधारमा ती सवारीसाधन फेला पारिएको हो । फेला परेका मोटरसाइकलमध्ये एउटा करिब ३५ लाख रुपैयाँ मूल्य बराबरको रहेको प्रहरीले जनाएको छ ।

चालु आर्थिक वर्षको चैतसम्म ट्राफिक प्रहरीले ५३४ वटा चोरी भएका दुईपांग्रे सवारीसाधन फेला पारिसकेको छ । यही अवधिमा उपत्यकाबाट सवारी हराएको भन्दै दुई हजार २६ जनाले निवेदन दिएको एसएसपी अधिकारीले जानकारी दिए ।

थप समाचारहरु

सुदूरपश्चिमका एमाले सांसद सँग गुण्डुमा ओलीको छलफल कर्णाली प्रदेश समन्वय परिषद्को ११औँ बैठक सुरु मातृभाषाको संरक्षण र प्रवर्द्धनमा प्रदेश सरकार प्रतिबद्ध : मुख्यमन्त्री बानियाँ नेपाल मेडिकल काउन्सिलका रजिस्ट्रार पदमुक्त नहुँदा उठे प्रश्न सुनचाँदीको मूल्य फेरि बढ्यो, सुन तोलाको २ लाख ९८ हजार नाघ्यो संघीय संसद् बैठकमा अब सांसदहरूको हाजिरी प्रणाली लागू गरिने वीर अस्पतालका निर्देशक डा. दिलिप शर्माको राजीनामा छायाँ सेन्टर भत्काउन माग गर्दै सम्पदाप्रेमीहरूको प्रदर्शन मन्त्रिपरिषद्को बैठक बस्दै ओमकार आयल इन्डस्ट्रिजका सञ्चालक विजय श्रेष्ठ पक्राउ प्रधानन्यायाधीश सिफारिसमा हर्क साम्पाङको आपत्ति सर्वोच्चद्वारा नदी किनारका बस्ती नहटाउन अन्तरिम आदेश नेपाल रेडक्रसका अध्यक्ष विनोदकुमार शर्माको राजीनामा इन्डोनेशियाको माउन्ट डुकोनो ज्वालामुखी विस्फोटमा तीन पर्वतारोहीको मृत्यु पशुपतिनाथ परिसर नजिक ३ ग्रिनेड फेला एसईई २०८२ को नतिजा सार्वजनिक गर्ने तयारी पूरा दार्चुलामा ४.१ म्याग्निच्युडको भूकम्प सगरमाथा आरोहण क्रममा लेक लागेर एक आरोहीको मृत्यु