बिजनेस पाटी
ललितपुर - एभरेष्ट कलर लिमिटेडको प्रारम्भिक सार्वजनिक निष्काशन (आइपिओ) बाँडफाँट असार ४ गते, बिहीबार सम्पन्न भएको छ । कम्पनीको सेयर निष्काशन तथा बिक्री प्रबन्धक मुक्तिनाथ क्यापिटल को कार्यालयमा गोलाप्रथा प्रक्रियामार्फत आइपिओ बाँडफाँट गरिएको हो ।
कम्पनीले गत जेठ २२ गतेदेखि २७ गतेसम्म सर्वसाधारण लगानीकर्ताका लागि प्रतिकित्ता रु. १०० अंकित मूल्यका कुल ६ लाख ५५ हजार ७०० कित्ता सेयर निष्काशन गरेको थियो, जसको कुल मूल्य रु. ६ करोड ५५ लाख ७० हजार बराबर रहेको थियो ।
सो अवधिमा आइपिओमा अत्यधिक माग देखिएको थियो । कुल २६ लाख ८७ हजार ४२१ जनाले आवेदन दिएका थिए, जसबाट २ करोड ८८ लाख ३३ हजार ७२० कित्ता सेयरका लागि माग परेको थियो ।
त्यसमध्ये २६ लाख ४१ हजार ९५९ आवेदन स्वीकृत भएको र बाँकी आवेदन रद्द भएको कम्पनीले जनाएको छ ।
मागभन्दा धेरै आवेदन परेपछि गोलाप्रथा प्रक्रियामार्फत सेयर बाँडफाँट गरिएको हो। परिणामस्वरूप ६५ हजार ५७० जना लगानीकर्ताले १० कित्ताका दरले सेयर प्राप्त गरेका छन् ।