प्रधानमन्त्री शाहको प्रेस तथा अनुसन्धान विज्ञमा दिपा दाहाल नियुक्त

बिजनेस पाटी

२०८२ चैत्र २०

255 views

प्रधानमन्त्री बालेन्द्र शाहको प्रेस तथा अनुसन्धान विज्ञ पदमा खोज पत्रकार, लेखक एवं लेक्चरर दिपा दाहाल नियुक्त हुनुभएको छ । प्रधानमन्त्रीको सल्लाहकार तथा सचिवालय व्यवस्थापन कार्यविधि–२०७४ बमोजिम शुक्रबार उहाँलाई उक्त पदमा नियुक्त गरिएको हो ।

दुई दशकभन्दा लामो समयदेखि पत्रकारिता र प्राज्ञिक क्षेत्रमा सक्रिय दाहालले नियुक्तिसँगै शुक्रबारदेखि नै आफ्नो कार्यभार सम्हाल्नुभएको छ । अब उहाँले प्रधानमन्त्री शाहको सञ्चार रणनीति, मिडिया व्यवस्थापन र अनुसन्धान क्षेत्रमा महत्वपूर्ण भूमिका निर्वाह गर्नुहुनेछ ।

सरकारले भ्रष्टाचार नियन्त्रण, सुशासन र सामाजिक न्यायका क्षेत्रमा उहाँको अनुभवलाई नीतिगत तहमा उपयोग गर्न यो नियुक्ति गरिएको जनाएको छ ।

दाहालसँग रेडियो, टेलिभिजन, छापा र अनलाइन माध्यममा २० वर्षभन्दा बढी व्यावसायिक पत्रकारिताको अनुभव रहेको छ । उहाँले पछिल्लो समय उकालो डटकममा वरिष्ठ संवाददाताका रूपमा खोज पत्रकारिता गर्दै आउनुभएको थियो ।

त्यसैगरी, उहाँ त्रिभुवन विश्वविद्यालय अन्तर्गत पद्मकन्या बहुमुखी क्याम्पसमा विगत सात वर्षदेखि पत्रकारिता अध्यापन गर्दै आउनुभएको छ । पत्रकारिता, सञ्चार सीप र मौलिक नेतृत्व (अथेन्टिक लिडरसिप) सम्बन्धी प्रशिक्षण दिने प्रशिक्षकको रूपमा पनि उहाँ परिचित हुनुहुन्छ ।

दाहाल ‘कोभिड: नसोचेको, नभोगेको संकट’ नामक अनुसन्धानमूलक पुस्तककी लेखिका समेत हुनुहुन्छ ।

उहाँले खोज पत्रकारिताका क्षेत्रमा विभिन्न राष्ट्रिय तथा अन्तर्राष्ट्रिय अवार्ड प्राप्त गरिसक्नुभएको छ, जसले उहाँको व्यावसायिक योगदानलाई थप प्रमाणित गरेको छ ।

थप समाचारहरु

फेसबुकबाट तपाईको प्रतिक्रिया