बिजनेस पाटी
ललितपुर – रुसविरुद्ध युरोपेली सङ्घ (इयू) को प्रतिबन्धको पछिल्लो प्याकेज रोक्ने हङ्गेरीले आइतबार चेतावनी दिएको छ ।
‘जबसम्म युक्रेनले हङ्गेरी आपूर्ति गर्ने पेट्रोलियम पदार्थको प्रमुख पाइपलाइन पुनः खोल्दैन, इयूको प्रतिबन्धको पछिल्लो प्याकेज रोक्नेछ,‘ हङ्गेरीका प्रधानमन्त्रीले आइतबार भन्नुभयो ।
“प्रतिबन्धहरूको लागि हङ्गेरीको कुनै समर्थन छैन; रूसविरूद्ध इयूले लगाउने घोषणा गरेको २० औँ प्रतिबन्ध प्याकेज अस्वीकार गरिनेछ,” प्रधानमन्त्री भिक्टर ओर्बानले एक्समा लेख्नुभएको छ।
‘जबसम्म युक्रेनले ड्रुज्बा पाइपलाइन मार्फत हङ्गेरी र स्लोभाकियामा तेल ट्रान्जिट पुनः सुरु गर्दैन, हामी किएभका लागि महत्त्वपूर्ण निर्णयहरू अगाडि बढ्न दिनेछैनौं,‘ विदेश मन्त्री पिटर सिजार्टोले एक्समा पोस्ट गरेको सन्देशमा भनिएको छ।
स्लोभाकिया र हङ्गेरीमा रुसी तेल पुर्याउन आफ्नो क्षेत्र पार गर्ने ड्रुज्बा पाइपलाइन जनवरी २७ मा भएको रुसी आक्रमणबाट क्षतिग्रस्त भएको युक्रेनले बताएको छ ।
फेब्रुअरीको सुरूमा इयूले रूसविरूद्ध बैंकिङ र ऊर्जा क्षेत्र लक्षित गर्दै नयाँ प्रतिबन्ध प्रस्ताव गरेको थियो, जुन सन् २०२२ फेब्रुअरी २४ मा रूसले युक्रेनमा आक्रमण गरेयताको २० औँ प्याकेज हो ।
युरोपेली आयोगले उसको व्यापार प्रतिरक्षा उपकरणलाई पनि सक्रिय गर्न चाहन्छ । रूसमा पुनः निर्यात हुने उच्च जोखिम देखाउँदै इयूले पहिलो पटक सबै मेशिन उपकरण र रेडियो उपकरणको निर्यातमा प्रतिबन्ध लगाउने प्रस्ताव गरेको छ ।
नयाँ प्रतिबन्ध लागू हुन इयूका सबै २७ सदस्य राष्ट्रहरूको स्वीकृति आवश्यक पर्छ ।
फेसबुकबाट तपाईको प्रतिक्रिया