बिजनेस पाटी
ललितपुर - ललितपुर – जिल्ला स्वास्थ्य कार्यालय बाँके का अनुसार बाँकेमा पाठेघरको मुखको क्यान्सरविरुद्धको एचपिभी खोप ९२ प्रतिशत किशोरीलाई लगाइएको छ । कूल आठ हजार ५८४ जनालाई खोप लगाउने लक्ष्य रहेकामा सात हजार ८९७ किशोरीलाई खोप लगाइएको हो, जुन लक्ष्यको ९२ प्रतिशत हो ।
जनस्वास्थ्य अधिकृत गोकर्ण गिरीका अनुसार खोप लगाउने लक्ष्य पूरा नजिक पुगेको छ । “केही छुट हुन सक्छ, तर एचपिभी खोप लगाउने कार्य सम्पन्न भएको छ,” उहाँले भन्नुभयो ।
पालिकागत तथ्याङ्कअनुसार कोहलपुरमा एक हजार ७००, खजुरा गाउँपालिकामा एक हजार, जानकी गाउँपालिकामा ६७०, र नरैनापुर गाउँपालिकामा ७३१ जनालाई खोप लगाइएको छ । त्यसैगरी बैजनाथ गाउँपालिकामा ८८१, राप्तीसोनारी गाउँपालिकामा ५८०, नेपालगञ्जमा एक हजार ९०९, र डडुवा गाउँपालिकामा ४२६ जनालाई खोप लगाइएको छ ।
खोपले एचपिभी प्रजाति १६ र १८ बाट हुने सङ्क्रमण रोक्ने भएकाले पाठेघरको मुखको क्यान्सरबाट बचाउन सुरक्षित र प्रभावकारी मानिएको छ । तथ्याङ्कअनुसार नेपालमा प्रत्येक दिन चार जना महिलाको पाठेघरको मुखको क्यान्सरबाट मृत्यु हुने गरेको छ ।
खोप अभियान माघ २५ देखि फागुन ११ सम्म सञ्चालन गरिएको थियो । गत वर्ष जिल्लामा ३३ हजार ७५९ जनालाई खोप लगाइएको थियो ।