बिजनेस पाटी
अमेरिकी राष्ट्रिय आतंकवाद विरोधी केन्द्रका निर्देशक जो केन्टले सामाजिक सञ्जालमार्फत आफ्नो पदबाट राजीनामा दिने घोषणा गरेका छन् । उनले इरानमा भइरहेको युद्धलाई आफ्नो नैतिक समर्थन गर्न नसक्ने उल्लेख गर्दै यो कदम उठाएको बताएका छन्।
केन्टका अनुसार इरानले अमेरिकालाई तत्काल कुनै खतरा खडा गरेको छैन र यो युद्ध इजरायल र शक्तिशाली अमेरिकी लबीको दबाबका कारण सुरु भएको हो। उनले राष्ट्रपति डोनाल्ड ट्रम्पलाई लेखेको पत्रमा भनेका छन्, ‘प्रशासनको सुरुमै उच्च पदस्थ इजरायली अधिकारी र अमेरिकी मिडियाले भ्रामक अभियान चलाएको छ।’
फेब्रुअरी २८ मा संयुक्त राज्य अमेरिका र इजरायलले इरानमा आक्रमण सुरु गरेदेखि कम्तीमा १३ अमेरिकी सैनिक मारिएका छन्। वाल स्ट्रिट जर्नलको रिपोर्ट अनुसार १० जना गम्भीर घाइते छन् भने करिब २०० जना सामान्य घाइते भएका छन्।
केन्टको राजीनामा डेमोक्र्याटिक सांसदहरू, व्यापारिक नेताहरू र ट्रम्पकै आफ्नै समर्थनकर्ता वर्गका केही समूहबाट भइरहेको तीव्र आलोचनाको बीच आएको हो। क्विनिपियाक युनिभर्सिटीको सर्वेक्षण अनुसार ५३ प्रतिशत मतदाताले इरानविरुद्धको अमेरिकी सैन्य कारबाहीको विरोध गरेका छन्, जबकि ४० प्रतिशतले समर्थन गरेका छन्। यसमा स्पष्ट दलीय विभाजन देखिएको छ—८९ प्रतिशत डेमोक्र्याट र ६० प्रतिशत स्वतन्त्र मतदाताले विरोध गरेका छन् भने ८५ प्रतिशत रिपब्लिकनले समर्थन गरेका छन्।
राजीनामा र सार्वजनिक असन्तुष्टिले ट्रम्प प्रशासनमाथि बढ्दो दबाबको संकेत गरेको विश्लेषकहरूले बताउँछन्।
फेसबुकबाट तपाईको प्रतिक्रिया