दिल्ली उच्च अदालतले करिश्मा कपूर र प्रिया कपूरलाई भन्यो – “कृपया मेलोड्रामा नगर्नुहोस्”

बिजनेस पाटी

२०८२ माघ १०

2k views

ललितपुर । भारतका प्रसिद्ध व्यवसायी तथा सोना कमस्टारका मालिक सञ्जय कपूरको इंग्ल्याण्डमा निधन भएपछि उनकी पूर्वपत्नी अभिनेत्री करिश्मा कपूरले सम्पत्ति बाँडफाँडमा गडबडी भएको आरोप लगाउँदै आएकी छन् । विशेषगरी आफ्ना सन्तानले पाउनुपर्ने उत्तराधिकारको हिस्सा नदिइएको उनको दाबी छ ।

सञ्जय कपूरकी हालकी पत्नी प्रिया कपूरसँग दिवङ्गत पतिले छोडेको अन्तिम वसीयत रहेको र सोही वसीयत कार्यान्वयन गर्न चाहेको बताइएको छ ।

हालै दिल्ली उच्च अदालतमा करिश्मा कपूरका सन्तान र उनीहरूको सौतेनी आमा प्रिया सचदेव कपूरबीच सञ्जय कपूरको सम्पत्तिसम्बन्धी विवादमा बहस भएको थियो । करिश्माका सन्तानले अमेरिकामा अध्ययनरत करिश्माकी छोरीको दुई महिनाको विश्वविद्यालय शुल्क नतिरेको आरोप लगाए ।

बालबालिकाका वकिलले वैवाहिक सम्झौताअनुसार सञ्जय कपूर आफ्ना सन्तानको शिक्षा तथा खर्चको जिम्मेवार रहेको र हाल सम्पत्ति प्रिया कपूरको नियन्त्रणमा भएकाले उनैले उक्त शुल्क तिर्नुपर्ने तर्क गरे ।

तर प्रिया कपूरको पक्षबाट वरिष्ठ अधिवक्ता राजीव नायरले ती सबै आरोप अस्वीकार गर्दै विश्वविद्यालय शुल्कसहित सन्तानका सबै खर्च पहिले नै तिरिसकिएको बताए । उनले शुल्क नतिरेको दाबी मिडियामा चर्चा पाउनका लागि बनावटी रूपमा उठाइएको पनि आरोप लगाए ।

अदालतले दुवै पक्षलाई कारबाहीलाई “मेलोड्रामाटिक” नबनाउन चेतावनी दिँदै यस्ता विषय पुनः अदालतमा नल्याउन निर्देशन दियो । न्यायाधीश ज्योति सिंहले प्रिया कपूरको कानुनी टोलीलाई यी विषय अदालत बाहिरै समाधान गर्न आग्रह गरिन् ।

यो विवाद करिश्मा कपूरका सन्तानले आफ्ना दिवङ्गत बाबुको भनिएको करिब ३० हजार करोड रुपैयाँ मूल्यको सम्पत्तिसँग सम्बन्धित वसीयतको वैधता चुनौती दिएको ठूलो कानुनी लडाइँको हिस्सा हो ।

सन्तानले प्रिया कपूरले आफ्नै स्वार्थलाई प्राथमिकता दिएको आरोप लगाएका छन् । त्यसको जवाफमा प्रिया कपूरले आरके फ्यामिली ट्रस्टबाट सन्तानले पहिले नै १,९०० करोड रुपैयाँ पाइसकेको दाबी गरेकी छन् ।
(भारत टाइम्स बाट )

थप समाचारहरु

फेसबुकबाट तपाईको प्रतिक्रिया