नेप्से सुस्त गतिमा , यस साता उकालो कि फेरि दबाबमा ?

बिजनेस पाटी

२०८२ माघ २५

918 views

ललितपुर – गत साता सेयर बजार सूचक नेप्से सीमित उतारचढावमै अड्किएको देखियो । अघिल्लो साता २७१४.०५ विन्दुमा बन्द भएको नेप्से ५.३५ अंक घट्दै २७०८.७० विन्दुमा आइपुगेको छ । अंकगत गिरावट सानो भए पनि बजारको चाल भने अझै अनिश्चयपूर्ण देखिन्छ ।
पाँच कारोबार दिन खुलेको बजारमा दुई दिन सुधार देखिए पनि तीन दिन गिरावट आएको थियो। यसले लगानीकर्ता अझै पर्ख र हेर को अवस्थामा रहेको संकेत गर्दछ ।

टेवा बलियो, प्रतिरोध नजिकिँदै
गत साता नेप्से २६४५–२६९० विन्दुको क्षेत्रमा टिकेर माथि फर्किएको छ । साताको अन्त्यमा सो दायरामाथि बन्द हुनुले बजारमा तत्काल ठूलो जोखिम नरहेको सन्देश दिएको छ । तर, बजारले गति लिन सकेमा २८००–२८६० विन्दुको क्षेत्रमा पुग्दा प्रतिरोधको सामना गर्नुपर्ने देखिन्छ ।

मैनबत्तीले के भन्छ ?
साप्ताहिक चार्टमा बनेको ‘ह्यामर’ संरचनाले बजारमा बिकवालाको दबाब क्रमशः कमजोर हुँदै गएको संकेत गर्दछ । साताका अन्तिम दुई कारोबार दिन लगातार हरियो क्यान्डल बन्नुले छोटो अवधिमा मनोवृत्ति सकारात्मकतर्फ मोडिन सक्ने संकेत दिएको छ ।

कारोबारले नदिएको साथ
मूल्य सूचकमा स्थिरता देखिए पनि कारोबार रकम भने उत्साहजनक छैन । दैनिक औसत करिब ९ अर्ब रुपैयाँमा सीमित कारोबारले बजारमा अझै ठूला खेलाडी सक्रिय नभएको देखाउँछ। बलियो उकालोका लागि कारोबार रकम बढ्नु आवश्यक देखिन्छ ।

सूचकहरू सुधारोन्मुख
एमएसिडी अझै नकारात्मक क्षेत्रमै रहे पनि बियरिश संकेत क्रमशः कमजोर बन्दै गएको छ । स्टकास्टिक आरएसआई न्यूट्रल क्षेत्रमा रहेकाले बजार न अत्यधिक ओभरसोल्ड छ, न ओभरबट—अर्थात् नयाँ दिशातर्फ जाने तयारीमा रहेको अवस्था देखिन्छ ।

समग्रमा, नेप्से गत साता सामान्य करेक्सनमै सीमित भए पनि प्राविधिक आधारहरू क्रमशः सुधारोन्मुख देखिएका छन् । आगामी साता बजारले स्पष्ट दिशा समाउने कि फेरि साइडवेजमै अड्किने भन्ने कुरा कारोबारको गति र लगानीकर्ताको विश्वासले निर्धारण गर्नेछ ।

थप समाचारहरु

फेसबुकबाट तपाईको प्रतिक्रिया