बिजनेस पाटी
गृह मन्त्रालयअन्तर्गतको अध्यागमन विभागले पर्यटकीय भिसामा रहेका विदेशीलाई नेपालमा हुने फुटबल खेलमा सहभागी नगराउन निर्देशन दिएको छ ।
बिहीबार (चैत ५ गते) विभागले अखिल नेपाल फुटबल संघ (एन्फा) लाई पत्र पठाउँदै पर्यटक भिसामा आएका विदेशी खेलाडीलाई खेलमा नसमावेश गर्न आग्रह गरेको हो ।
विभागले पत्रमा उल्लेख गरेको छ कि राष्ट्रिय महिला/पुरुष लिग फुटबलमा पर्यटक भिसा भएका विदेशी खेलाडी सहभागी भएको उजुरी प्राप्त भएको छ । त्यसैले विदेशी खेलाडीलाई सहभागी गराउनुपरेमा नियमानुसार कार्यसहमति र श्रम स्वीकृति लिनुपर्ने स्पष्ट गरिएको छ।
साथै, अध्यागमन नियमावली, २०५१ को नियम २० अनुसार भिसा प्राप्त विदेशीले तोकिएको काम मात्र गर्न पाउने व्यवस्था रहेको पनि विभागले स्मरण गराएको छ ।
विभागले आजदेखि अनुगमन सुरु गरिएको जनाउँदै स्वीकृति नलिएका विदेशी खेलाडीले भिसाको उद्देश्यविपरीत खेल खेलेमा तत्काल कारबाही हुने चेतावनी दिएको छ ।
फेसबुकबाट तपाईको प्रतिक्रिया