सरसफाइ सप्ताह २०८३ सोमबार देखि देशभर सञ्चालन

ललितपुर - सरकारले सार्वजनिक सेवा प्रवाहलाई स्वच्छ, मर्यादित र वातावरणमैत्री बनाउन सोमबारदेखि आगामी जेठ १ गतेसम्म देशभर ‘सरसफाइ सप्ताह २०८३’ सञ्चालन गर्ने भएको छ ।

प्रधानमन्त्री तथा मन्त्रिपरिषद्को कार्यालयले विशेष मार्गदर्शन जारी गर्दै सङ्घीय मन्त्रालयदेखि स्थानीय तहसम्मका सबै सरकारी निकायलाई अभियानमा सक्रिय सहभागी हुन निर्देशन दिएको हो । अभियानको औपचारिक उद्घाटन सोमबार बिहान ८ः३० बजे वीर अस्पतालमा स्वास्थ्य तथा जनसङ्ख्यामन्त्री निशा मेहेताको उपस्थितिमा हुने तय गरिएको छ ।

सरकारले जारी गरेको ‘सरसफाइ सप्ताह सञ्चालनसम्बन्धी मार्गदर्शन,२०८३ अनुसार न्यून लागतमा अधिकतम प्रतिफल प्राप्त हुने गरी सरकारी कार्यालयहरूमा सरसफाइ मापदण्ड कार्यान्वयन गरिनेछ । नियमित सरसफाइ र फोहोर व्यवस्थापनको स्पष्ट मापदण्ड नहुँदा सेवा प्रवाह, कर्मचारी तथा सेवाग्राहीको स्वास्थ्यमा नकारात्मक असर परेको निष्कर्षपछि यो अभियान अघि बढाइएको हो ।

मार्गदर्शनमा सरकारी सूचना बोर्ड नागरिक बडापत्र र सङ्केत चिह्नहरू व्यवस्थित राख्नुपर्ने, चर्किएका भित्ताको मर्मत तथा रङरोगन गर्नुपर्ने र कार्यालयका मुख्य सेवा क्षेत्र तथा प्रवेशद्वार सफा र आकर्षक बनाइने उल्लेख छ ।

त्यस्तै, सबै शौचालयलाई दुर्गन्धरहित बनाइने, नियमित पानी र साबुनको व्यवस्था सुनिश्चित गरिने तथा महिलामैत्री र अपाङ्गतामैत्री बनाउनुपर्ने व्यवस्था गरिएको छ। दैनिक सरसफाइको अभिलेख राख्न पनि निर्देशन दिइएको छ ।

कार्यालयहरूमा कुहिने र नकुहिने फोहोर छुट्याउन कम्तीमा दुई प्रकारका डस्टबिन राख्नुपर्ने, खुला रूपमा फोहोर जलाउन नपाइने तथा पुराना काम नलाग्ने सामग्रीको उचित व्यवस्थापन गर्नुपर्ने व्यवस्था गरिएको छ । कार्यालय परिसरको १०० मिटर वरिपरि सफाइ राख्न, नाली तथा ढल सफा गर्न र अव्यवस्थित तार तथा पोस्टर हटाउन पनि निर्देशन दिइएको छ ।

सेवाग्राहीलाई सम्मानजनक वातावरण उपलब्ध गराउन हेल्प डेस्क स्थापना गर्ने र सूचना प्रणालीलाई प्रभावकारी बनाउने योजना पनि समावेश गरिएको छ ।

अभियानलाई दिगो बनाउन प्रत्येक निकायले ‘सरसफाइ सम्पर्क व्यक्ति’ तोक्नुपर्ने, साप्ताहिक कार्यतालिका तयार गरी मासिक स्व–मूल्याङ्कन गर्नुपर्ने व्यवस्था गरिएको छ ।

यस अभियानको कार्यान्वयन र अनुगमनको जिम्मेवारी सम्बन्धित निकाय प्रमुखलाई दिइएको छ । अभियानमा सङ्घीय, प्रादेशिक र स्थानीय कार्यालयसँगै सार्वजनिक शैक्षिक संस्थाहरू पनि सहभागी हुनेछन् ।

थप समाचारहरु

सुदूरपश्चिमका एमाले सांसद सँग गुण्डुमा ओलीको छलफल मातृभाषाको संरक्षण र प्रवर्द्धनमा प्रदेश सरकार प्रतिबद्ध : मुख्यमन्त्री बानियाँ नेपाल मेडिकल काउन्सिलका रजिस्ट्रार पदमुक्त नहुँदा उठे प्रश्न सुनचाँदीको मूल्य फेरि बढ्यो, सुन तोलाको २ लाख ९८ हजार नाघ्यो संघीय संसद् बैठकमा अब सांसदहरूको हाजिरी प्रणाली लागू गरिने वीर अस्पतालका निर्देशक डा. दिलिप शर्माको राजीनामा मन्त्रिपरिषद्को बैठक बस्दै ओमकार आयल इन्डस्ट्रिजका सञ्चालक विजय श्रेष्ठ पक्राउ प्रधानन्यायाधीश सिफारिसमा हर्क साम्पाङको आपत्ति सर्वोच्चद्वारा नदी किनारका बस्ती नहटाउन अन्तरिम आदेश इन्डोनेशियाको माउन्ट डुकोनो ज्वालामुखी विस्फोटमा तीन पर्वतारोहीको मृत्यु पशुपतिनाथ परिसर नजिक ३ ग्रिनेड फेला एसईई २०८२ को नतिजा सार्वजनिक गर्ने तयारी पूरा दार्चुलामा ४.१ म्याग्निच्युडको भूकम्प ट्राफिक कारबाहीमा पाँचपटक पर्ने चालकको लाइसेन्स नै निलम्बन ! बजेट अधिवेशन भोलिदेखि सुरु, राष्ट्रपतिले प्रस्तुत गर्ने सरकारको नीति तथा कार्यक्रम २५ लाख पुरस्कार राशि रहेको  गायन रियालिटी शो ‘गाउँछ गीत’ जेठबाट प्रसारणमा आउने  निर्वाचन कानुन सुधारका लागि दलहरूलाई आयोगको आह्वान