बिजनेस पाटी
ललितपुर -
ललितपुर । सुपर हेवा पावर कम्पनी लिमिटेडले सर्वसाधारणका लागि आईपीओ निष्कासनको प्रक्रिया अघि बढाउँदै मुक्तिनाथ क्यापिटल लिमिटेडसँग औपचारिक प्रत्याभूति सम्झौता गरेको छ । कम्पनीको सेयर सार्वजनिक निष्कासनलाई सुनिश्चित गर्न उक्त सम्झौता गरिएको हो ।
सम्झौताअनुसार कम्पनीले जारी गर्ने आईपीओ पूर्ण रूपमा बिक्री नभएमा बाँकी सेयर मुक्तिनाथ क्यापिटलले प्रत्याभूति गर्नेछ । यससँगै सुपर हेवा पावरको आईपीओ निष्कासनमा लगानीकर्ताको विश्वास बढ्ने अपेक्षा गरिएको छ । कम्पनीले नियामक निकायबाट आवश्यक स्वीकृति पाएपछि आईपीओ जारी गर्ने तयारी गरेको जनाएको छ ।
सार्वजनिक निष्कासनबाट संकलित रकम आयोजनाको विकास, ऋण व्यवस्थापन तथा वित्तीय संरचना सुदृढीकरणमा प्रयोग गरिने बताइएको छ । ऊर्जा क्षेत्रमा सूचीकृत हुने तयारीमा रहेको सुपर हेवा पावरले आईपीओपछि पुँजी बजारमार्फत दीर्घकालीन लगानी विस्तार गर्ने लक्ष्य लिएको छ । बजार विश्लेषकहरूका अनुसार प्रत्याभूति सम्झौताले कम्पनीको आईपीओलाई सफल बनाउन सहयोग पुर्याउनेछ ।