बिजनेस पाटी
ललितपुर - ललितपुर – डोनाल्ड ट्रम्पले लगाएको व्यापक आयात करविरुद्ध सर्वोच्च अदालत (अमेरिका)ले दिएको निर्णयपछि अन्तर्राष्ट्रिय व्यापार क्षेत्रमा अनिश्चितता बढेको छ । यद्यपि प्रारम्भिक प्रतिक्रिया स्वरूप एसियाली वित्तीय बजार अपेक्षाकृत शान्त देखिएका छन् र धेरै सूचकहरू उकालो लागेका छन् ।
शुक्रबार सार्वजनिक गरिएको फैसलाले २०२५ अप्रिलमा ट्रम्पले दर्जनौँ देशमाथि घोषणा गरेको व्यापक कर व्यवस्थालाई कानुनी चुनौती दिएको छ । उक्त निर्णयले त्यसयता भएका व्यापार वार्तामा बनेका सहमतिहरूलाई प्रभावित पार्न सक्ने अनुमान गरिएको छ। चीन र दक्षिण कोरियाजस्ता देशहरू अब वासिङ्टनको अर्को कदम पर्खिरहेका छन् ।
चीनको वाणिज्य मन्त्रालयले अन्तर्राष्ट्रिय आपतकालीन आर्थिक शक्ति ऐनअन्तर्गत लगाइएका करबारे विस्तृत मूल्याङ्कन गरिरहेको जनाएको छ । मन्त्रालयले अमेरिकालाई एकपक्षीय कर हटाउन आग्रह गरेको छ र व्यापार युद्धमा कसैको पनि जीत नहुने बताएको छ ।
अदालतको निर्णयपछि ट्रम्पले वैकल्पिक कानूनी प्रावधान प्रयोग गर्दै १५ प्रतिशत विश्वव्यापी कर प्रस्ताव गरेका छन् । यसले चीन र केही एसियाली निर्यातकर्तालाई राहत दिन सक्ने भए पनि जापान, युनाइटेड किंगडमलगायतका देशमा कर दर बढ्न सक्ने अनुमान छ ।
अमेरिकी व्यापार प्रतिनिधि कार्यालयले अमेरिका व्यापार सम्झौताप्रति प्रतिबद्ध रहेको बताएको छ । अधिकारीहरूले सम्झौताहरू परिस्थितिअनुसार बदलिने नभई दीर्घकालीन सहमतिमा आधारित हुने बताएका छन् ।
दक्षिण कोरियाका व्यापारमन्त्रीले नयाँ कर लागू भए अनिश्चितता थप गहिरिन सक्ने चेतावनी दिएका छन् । अटोमोबाइल र स्टिलजस्ता निर्यात क्षेत्र पहिले नै करको दायरामा रहेकाले कम्पनीहरूलाई बजार विविधीकरणमा सहकार्य गर्न सुझाव दिइएको छ ।
बजारतर्फ, अमेरिकी फ्युचर्स घटेका छन् भने डलर कमजोर भएको छ। तर एसियाली बजारमा सकारात्मक संकेत देखिएको छ—हङकङको ह्याङ सेङ सूचकाङ्क २.४ प्रतिशतले उकालो लागेको छ । व्यापार नीतिमा आउने परिवर्तनले आगामी दिनमा बजारको दिशा निर्धारण गर्ने अपेक्षा गरिएको छ ।