फिलिपिन्समा ७.४ म्याग्निच्युडको भूकम्प, सुनामीको चेतावनी

बिजनेस पाटी

२०८२ आश्विन २४

3.1k views

ललितपुर। फिलिपिन्सको मिन्दानाओ क्षेत्रमा आज (शुक्रबार) बिहान ७.४ म्याग्निच्युडको भूकम्प गएको छ । अधिकारीहरूले यो शक्तिशाली भूकम्पपछि “विनाशकारी सुनामी” आउने चेतावनी जारी गर्दै जनतालाई तटिय क्षेत्रबाट तत्काल सुरक्षित स्थानतर्फ सार्न आग्रह गरेका छन् ।

भूकम्प मिन्दानाओ क्षेत्रको डाभाओ ओरिएन्टल प्रान्तस्थित मनाय टाउन नजिकै समुद्रको सतहमा गएको बताइएको छ

फिलिपिन्सको भूकम्प विज्ञान तथा ज्वालामुखी संस्थानले चेतावनी दिँदै भनेको छ, “स्थानीय सुनामी परिदृश्यका आधारमा केही क्षेत्रमा सामान्य ज्वारभाटाभन्दा एक मिटर वा सोभन्दा बढी उचाइका छालहरू आउन सक्ने छन्, जुन बन्द खाडी तथा साँघुरा जलसन्धिहरूमा अझ उच्च हुन सक्छन ।”

संस्थाका अनुसार पहिलो सुनामीका छालाहरू स्थानीय समयअनुसार बिहान ९ः४३ देखि ११ः४३ बीच आइपुग्ने सम्भावना छ र यी छालाहरू केही घण्टासम्म जारी रहन सक्छन् ।

हालसम्म कुनै मानवीय क्षतिको विवरण प्राप्त नभए पनि अधिकारीहरूले उद्धार र आपतकालीन तयारीलाई उच्च सतर्कतामा राखेका छन् ।