पूर्वी जेरुसेलममा एकैपटक ६९ जना विस्थापित, सन् २००९ यताकै ठूलो घटना

ललितपुर - इजरायली अधिकारीहरूले पूर्वी जेरुसेलमको अत–तुर क्षेत्रमा रहेको एक आवासीय भवन भत्काउँदा एकैपटक ६९ जना विस्थापित भएका छन् । संयुक्त राष्ट्रसंघका मानवीय मामिला हेर्ने अधिकारीहरूका अनुसार, सन् २००९ यता एउटै भवन भत्काउँदा यति ठूलो संख्यामा मानिस विस्थापित भएको यो पहिलो घटना हो ।

संयुक्त राष्ट्रसंघको मानवीय मामिला समन्वय कार्यालय (ओसीएचए) का अनुसार, उक्त भवनमा बसोबास गर्ने ६९ जनामध्ये आधाभन्दा बढी बालबालिका थिए । ओसीएचए र साझेदार संस्थाका प्रतिनिधिहरूले घटनास्थलको निरीक्षण गरेका थिए । प्रभावित परिवारहरूले इजरायली सेनाले उनीहरूलाई आफ्ना सामान निकाल्न नदिएको र धेरै सामान भग्नावशेषमुनि पुरिएको बताएका छन् ।

साझेदार संस्थाहरूले प्रभावित परिवारको तत्कालीन आवश्यकता मूल्यांकन गरी उनीहरूलाई घरभाडा सहयोग तथा अत्यावश्यक सामग्री उपलब्ध गराउने व्यवस्था गरेका छन् । साथै, उनीहरूलाई आपत्कालीन आश्रय, आवश्यक सामग्री र मनोसामाजिक सहयोग पनि प्रदान गरिएको छ ।

ओसीएचएका अनुसार, यस वर्ष मात्रै इजरायली अधिकारीहरूले पश्चिम किनारामा एक हजार ८०० भन्दा बढी प्यालेस्टिनीका घर भत्काएका वा घरधनीलाई आफैं घर भत्काउन बाध्य पारेका छन् । अधिकांश घर इजरायलबाट निर्माण अनुमति प्राप्त नभएको भन्दै भत्काइएको हो। प्रभावित क्षेत्रमा प्यालेस्टिनीहरूलाई यस्तो अनुमति अत्यन्तै कम मात्र दिइने ओसीएचएले जनाएको छ ।

गाजामा खानेपानी संकट गहिरिँदै

यसैबीच, गाजामा पानी र सरसफाइसम्बन्धी मानवीय सहायता पनि प्रभावित भएको ओसीएचएले जनाएको छ । आर्थिक स्रोतको अभाव तथा अत्यावश्यक सामग्रीको प्रवेशमा लगाइएको प्रतिबन्धका कारण पानी आपूर्ति प्रणाली सञ्चालनमा कठिनाइ भइरहेको छ ।

इन्जिन तेल, स्पेयर पाट्र्स तथा सवारीसाधन र मेसिन सञ्चालनका लागि आवश्यक उपकरणजस्ता सामग्री आयातमा प्रतिबन्ध रहेकाले दक्षिणी गाजाका दुईवटा समुद्री पानी प्रशोधन केन्द्रमा पानी उत्पादन घटेको छ ।

उपकरणको समयमै मर्मतसम्भार हुन नसक्दा देर अल–बालाह र खान युनिसमा रहेका करिब ५ लाख मानिसले पाउने पिउने पानीको मात्रा केही घटेको साझेदार संस्थाहरूले बताएका छन् । गाजाभरि करिब चारमध्ये तीन परिवार पानीको पूर्वाधार पुनःस्थापित नभएसम्म ट्यांकरमार्फत वितरण गरिने पानीमा निर्भर छन् ।

मानवीय संस्थाहरूले दैनिक करिब २५ हजार घनमिटर पिउने पानी वितरण गरिरहेका छन् । तर पानी वितरणमा प्रयोग हुने सवारीसाधनको नियमित मर्मत आवश्यक पर्ने र सुरक्षा अवस्थाका कारण विभिन्न क्षेत्रमा पहुँच अवरुद्ध हुने गरेकाले समस्या थपिएको छ । विशेषगरी तथाकथित ‘येलो लाइन’ आसपासका क्षेत्रमा पहुँच प्रभावित हुने गरेको ओसीएचएले जनाएको छ ।

सेप्टेम्बरको चौथो सातामा मात्रै मानवीय साझेदार संस्थाहरूले ट्यांकरबाट वितरण गरिएको पानी संकलन गर्न सर्वसाधारणलाई सहयोग पु¥याउने उद्देश्यले १० लिटर क्षमताका १२ हजारभन्दा बढी पानीका कन्टेनर वितरण गरेका थिए ।

फोहोर व्यवस्थापनमा समेत चुनौती

आयातमा प्रतिबन्धित सामग्रीको अभावका कारण गाजामा ठोस फोहोर संकलन र व्यवस्थापनका लागि आवश्यक सवारीसाधनसमेत सञ्चालन गर्न कठिन भएको छ । त्यसका कारण कतिपय क्षेत्रमा गधा तान्ने गाडा र संयुक्त राष्ट्रसंघका ट्रकको प्रयोग गर्नुपरेको छ ।

ओसीएचएका अनुसार, प्रतिबन्धित सामग्रीको प्रवेशका लागि आवश्यक स्वीकृति उपलब्ध गराउनुका साथै गाजाका दुईवटा ल्यान्डफिल क्षेत्रमा पहुँच पुनःस्थापित गर्न आवश्यक छ । अन्यथा घना बस्ती भएका क्षेत्रमा फोहोर थप थुप्रिँदै जाने जोखिम छ ।

ओसीएचएले गाजामा मानवीय सहायता तथा अत्यावश्यक सेवा सञ्चालनका लागि निरन्तर इन्धन आपूर्तिका लागि आवश्यक आर्थिक स्रोत सुनिश्चित गर्नुपर्नेमा जोड दिएको छ ।

थप समाचारहरु

अमेरिकी गाडी उद्योगमा उत्पादन र लगानी विस्तारको तयारी ह्वाइट हाउसको एआई कार्यदलले अत्यधिक नियमन रोक्ने बेलायती सैन्य अड्डाबाट सबै अमेरिकी ‘बी–१ विमान’ हटाइए हुथीविरुद्ध निर्णायक सैन्य अभियान सञ्चालन गर्ने यमन सरकारको घोषणा इमरानको रिहाइ माग्दै मार्च होर्मुजको तनावबीच मध्यपूर्वको तेल निर्यातमा वृद्धि विकासोन्मुख देशको आवश्यकतामा केन्द्रित हुँदै चीनको विकास पहल मलेसियाबाट यस वर्ष करिब १० हजार म्यान्माली स्वदेश फर्किए नाइजेरियामा सैन्य विमान दुर्घटना, ३२ जनाको मृत्यु दक्षिण कोरियामा कारको माग बढ्दो, ईभी बिक्रीमा अग्रस्थानमा सन् २०३० सम्म विश्वलाई थप ५ करोड शिक्षक आवश्यक पर्ने अनुमान : युनेस्को हालजेनलाई भौतिकशास्त्रको नोबेल पुरस्कार बङ्गलादेशको उथलपुथलमा आइएसआइ संलग्न रहेको आरोप गाजाको युद्धले गहिरिँदै गएको इजरायलीको असुरक्षा नोबेल रसायनशास्त्रमा सम्भावित दाबेदार हाइटीमा चुनाव अनिश्चितकालका लागि स्थगित इराकमा ठूलो परिमाणको लागूऔषध बरामद, तस्करी योजना विफल