चर्किँदो द्वन्द्व: मध्यपूर्वमा तनाव उत्कर्षमा

मध्यपूर्वमा जारी युद्धले आइतबार नयाँ उचाइ लिँदै विभिन्न देशहरूमा सैन्य गतिविधि, आक्रमण र कूटनीतिक पहलहरू तीव्र बनेका छन् । इरान, इजरायल र अमेरिकाबीचको तनाव विस्तार हुँदै जाँदा क्षेत्रीय सुरक्षामा गम्भीर चुनौती उत्पन्न भएको देखिएको छ ।

आइतबार इरानले आफ्नै भूभागमा थप आक्रमणको सामना गर्नुपरेको छ । अमेरिका–इजरायल संयुक्त आक्रमणले रणनीतिक महत्त्वको स्ट्रेट अफ होर्मुज नजिक रहेको बन्दर खमीर बन्दरगाह सहरमा प्रहार गर्दा पाँच जनाको मृत्यु भएको इरानी राज्य मिडियाले जनाएको छ भने चार जना घाइते भएका छन् । यसैबीच, राजधानी तेहरानका विभिन्न स्थानमा शक्तिशाली विस्फोटका आवाजहरू सुनिएका छन् । विशेषगरी उत्तरी तेहरान क्षेत्रमा धुवाँ उठेको देखिएको छ, जसले आक्रमणको प्रभाव व्यापक रहेको सकेत गर्दछ ।

यसको जवाफस्वरूप इरानले पनि क्षेत्रीय स्तरमा आक्रमण तीव्र पारेको जनाएको छ । इरानको रिभोलुसनरी गार्ड्सले संयुक्त अरब इमिरेट्स र बहराइनका एल्युमिनियम उद्योगहरूमा मिसाइल तथा ड्रोन प्रहार गरेको दाबी गरेको छ । ती उद्योगहरूलाई अमेरिकी सैन्य तथा एयरोस्पेससँग जोडिएको संरचना भन्दै लक्ष्य बनाइएको बताइएको छ ।

यसैक्रममा, इजरायल–लेबनान सीमामा पनि हिंसा जारी छ । इजरायली सेनाले दक्षिण लेबनानमा थप एक सैनिकको ज्यान गएको पुष्टि गरेको छ । मार्च २ देखि हिज्बुल्लाहले इजरायलतर्फ रकेट आक्रमण सुरु गरेपछि यो पाँचौँ सैन्य मृत्यु भएको हो । मृत्यु हुने सैनिक २२ वर्षीय सार्जन्ट मोशे यिट्जचाक हाकोहेन काट्ज रहेका छन् ।

अमेरिकी रक्षा मन्त्रालय पेन्टागनले पनि सम्भावित स्थलगत कारबाहीको तयारी गरिरहेको समाचार बाहिरिएको छ । वासिङ्टन पोस्टका अनुसार खारग टापु र स्ट्रेट अफ होर्मुज आसपासका क्षेत्रमा सीमित स्तरका सैन्य अपरेसन गर्ने योजना बनाइँदैछ, यद्यपि राष्ट्रपति डोनाल्ड ट्रम्पले औपचारिक स्वीकृति दिनुभएको छैन । सम्भावित कारबाही पूर्ण युद्ध नभई विशेष फौज र पैदल सेनामार्फत लक्षित छापा अभियान हुने बताइएको छ ।

कुवेतले पनि आफ्नो सुरक्षालाई ध्यानमा राख्दै वायु रक्षा प्रणाली सक्रिय बनाएको जनाएको छ । त्यहाँका सशस्त्र बलले मिसाइल र ड्रोन आक्रमणको सम्भावित खतरा निष्क्रिय पारिएको र विस्फोटका आवाजहरू त्यसैको परिणाम भएको स्पष्ट पारेका छन् ।

यसैबीच, इरानले मध्यपूर्वस्थित अमेरिकी विश्वविद्यालयहरूलाई समेत चेतावनी दिएको छ । अमेरिका–इजरायल आक्रमणमा आफ्ना दुई विश्वविद्यालय ध्वस्त भएको आरोप लगाउँदै ती घटनाको सार्वजनिक निन्दा नगरे लक्ष्य बनाइने चेतावनी दिइएको छ ।

तनाव कम गर्न कूटनीतिक प्रयास पनि अघि बढिरहेका छन् । पाकिस्तानले इस्लामाबादमा साउदी अरेबिया, इजिप्ट र टर्कीका विदेश मन्त्रीहरूलाई आमन्त्रण गरी क्षेत्रीय स्थिरताबारे छलफल गर्ने तयारी गरेको छ । पाकिस्तानले इरान र अमेरिकाबीच सन्देश आदानप्रदानमा मध्यस्थ भूमिका खेलिरहेको बताइएको छ ।

युद्धमा नयाँ मोर्चा थपिँदै यमनका हुथी विद्रोहीहरू पनि सक्रिय भएका छन् । इरान समर्थित उक्त समूहले इजरायलमाथि दुईवटा मिसाइल प्रहार गरेको दाबी गरेको छ । यसअघि उनीहरूले आक्रमण जारी रहेमा युद्धमा सहभागी हुने चेतावनी दिएका थिए ।

इजरायलभित्रै पनि युद्धविरुद्ध असन्तुष्टि बढ्दै गएको देखिएको छ । तेल अभिवसहित विभिन्न सहरमा सयौँ नागरिकले प्रदर्शन गरेका छन् । सुरक्षा बलले ती प्रदर्शन नियन्त्रण गर्ने प्रयास गरेको छ, यद्यपि सहभागिता क्रमशः बढ्दै गएको जनाइएको छ ।

अर्कोतर्फ, अमेरिकाले इराकी कुर्दिस्तानका नेता नेचिरवान बर्जानीको निवासमा भएको ड्रोन आक्रमणको कडा निन्दा गरेको छ । उक्त घटनामा इरान समर्थित मिलिशियाहरूको संलग्नता रहेको आरोप लगाइएको छ ।

यसैबीच, इजरायलको मध्य भागस्थित एस्ताओल गाउँमा इरानी मिसाइल प्रहार हुँदा ११ जना घाइते भएका छन् । उक्त आक्रमणले आवासीय क्षेत्रमा ठूलो खाडल बनाएको छ । यसअघि पनि सोही क्षेत्रमा भएको अर्को आक्रमणमा नौ जनाको मृत्यु भएको थियो ।

थप समाचारहरु

अमेरिकाद्वारा इरानलाई १५ बुँदे युद्धविराम प्रस्ताव, मध्यपूर्वमा तनाव कायमै होर्मुज खुला गर्ने इरानको निर्णय, मध्यपूर्वमा आशा र तनाव दुवै अष्ट्रेलियामा मुद्रास्फीति घटेर ३.७ प्रतिशतमा, अपेक्षाभन्दा राम्रो स्थिति युक्रेनमा व्यापक आक्रमण, कैयौँ सहरमा जनजीवन प्रभावित इरानी आक्रमणको जवाफ दिएको इजरायलको दावी मध्यपूर्व द्वन्द्व चर्किँदै, शान्ति वार्ता संकटमा सुडानमा ड्रोन आक्रमण: २८ जनाको मृत्यु जिबूती तटमा आप्रवासी बोकेको डुङ्गा पल्टिदा ९ जनाको मृत्यु, ४५ बेपत्ता मध्यपूर्व युद्धबारे वार्तामा इरान गम्भीर हुनुपर्ने ट्रम्पको भनाइ इजरायली आक्रमणमा इरानी नौसेनाका कमान्डरको मृत्यु, उक्त क्षेत्र थप सुरक्षित भएको अमेरिकाको दाबी अफगानिस्तानमा भारी वर्षा र बाढी : पाँच जनाको मृत्यु, छ घाइते बहराइन र यूएई होटलमा अमेरिकी सैनिकको उपस्थितिः इरानको कडा प्रतिक्रिया मध्यपूर्व तनाव चर्किंदै, कूटनीति र आक्रमण सँगसँगै इरानी विद्यालय विस्फोटमा दोषीलाई कारबाहीको माग ‘नो किङ्स’ अभियानमार्फत ट्रम्पविरुद्ध देशव्यापी विरोध मध्यपूर्व तनाव बढ्दैः अमेरिकी बेसमाथि पुनः ड्रोन आक्रमण प्रयास