बिमा रकम अड्किँदा प्रदेश अस्पताल पर्वत सेवा सङ्कुचनको जोखिममा

ललितपुर – स्वास्थ्य बिमाबापतको भुक्तानी लामो समयदेखि नपाउँदा पर्वत जिल्लाको एकमात्र सुविधासम्पन्न प्रदेश अस्पताल गम्भीर आर्थिक दबाबमा परेको छ । बिमा गरेका बिरामीको उपचार गरेबापत पाउनुपर्ने रु तीन करोडभन्दा बढी रकम अझै अस्पतालले प्राप्त गर्न सकेको छैन ।

अस्पतालका प्रमुख मेडिकल सुपरिटेन्डेन्ट डा ढुण्डीराज पौडेलका अनुसार गत आर्थिक वर्षदेखि स्वास्थ्य बिमा तथा डायलायसिस सेवाबापतको रकम भुक्तानी नहुँदा अस्पतालका नियमित सेवा र व्यवस्थापन प्रत्यक्ष प्रभावित बनेका छन् । सरकारले भुक्तानी गर्नुपर्ने रकम समयमै नदिँदा बक्यौता रकम क्रमशः बढ्दै गएको उहाँले जानकारी दिनुभयो ।

स्वास्थ्य बिमा कार्यक्रमअन्तर्गत उपचार गरिएका बिरामीको परीक्षण, औषधि तथा सेवाको खर्च सरकारले अस्पताललाई उपलब्ध गराउनुपर्ने व्यवस्था छ । तर भुक्तानीमा निरन्तर ढिलाइ हुँदा औषधि तथा उपकरण खरिद, कर्मचारीको तलब–भत्ता वितरण र अन्य प्रशासनिक काममा समस्या उत्पन्न भएको डा पौडेलले बताउनुभयो । पटकपटक सम्बन्धित निकायमा माग गर्दा पनि हालसम्म ठोस सुनुवाइ नभएको उहाँको गुनासो छ ।

स्वास्थ्य बिमा गरेका सेवाग्राही सामान्य समस्या लिएर पनि अस्पताल आउने गरेको र उनीहरूलाई सेवा दिनैपर्ने बाध्यता रहेको उल्लेख गर्दै उहाँले भन्नुभयो, “भुक्तानी नआउँदा औषधि, प्रयोगशाला सेवा र आवश्यक सामग्री व्यवस्थापन गर्न कठिन भइरहेको छ ।” हालसम्म अस्पताल व्यवस्थापन समितिको कोषबाट जेनतेन काम चलाइए पनि अब सेवा नै प्रभावित हुने अवस्था देखिन थालेको उहाँको भनाइ छ ।

जिल्लामा स्वास्थ्य बिमामा आबद्ध झन्डै ४५ प्रतिशत नागरिकले यही अस्पतालबाट सेवा लिँदै आएका छन् । अस्पताल व्यवस्थापन समितिका अध्यक्ष याबहादुर परियारले सरकारले तोकेको दररेटअनुसार रकम पाउनुपर्ने भए पनि हरेक वर्ष भुक्तानीमा समस्या झेल्नुपरेको बताउनुभयो । स्वास्थ्य बिमा बोर्डमार्फत मन्त्रालयमा बिल पेस गरिए पनि समयमै रकम नआउँदा अस्पताल आर्थिक सङ्कटतर्फ धकेलिएको उहाँको भनाइ छ ।

स्वास्थ्य बिमा योजनाअनुसार एक परिवारले वार्षिक रु तीन हजार ५०० प्रिमियम तिरेमा पाँच जनासम्मका लागि रु एक लाख बराबरको उपचार सुविधा पाउने व्यवस्था छ । पाँच जनाभन्दा बढी सदस्य भएमा प्रति सदस्य रु ७०० थप योगदान बुझाउनुपर्ने र उपचार सुविधा अधिकतम रु दुई लाखसम्म उपलब्ध हुने प्रावधान छ ।

केही दिनअघि अस्पताल निरीक्षणका क्रममा स्वास्थ्य तथा जनसङ्ख्यामन्त्री डा सुधा गौतमसमक्ष बिमा रकम भुक्तानीका लागि ज्ञापनपत्र बुझाइएको थियो । सो क्रममा मन्त्री गौतमले देशभरका अस्पतालहरू बिमाबापतको रकम नपाएर समस्यामा परेको स्वीकार गर्दै वैकल्पिक स्रोत खोजी गरी बजेट व्यवस्थापन गर्ने प्रयास भइरहेको जानकारी दिनुभएको थियो ।

थप समाचारहरु

उपत्यकामा वायु प्रदूषण बढेसँगै स्वास्थ्य मन्त्रालयद्वारा सतर्कता अपनाउन आग्रह प्रहरी अस्पताललाई ‘सेन्टर फर हेल्थ एक्स्लेन्स’का रुपमा विकास गरौँ’ स्वास्थ्यसम्बन्धी सबै विवरण उपलब्ध हुने प्रणाली लागू गर्ने तयारी विश्व हात स्वच्छता दिवस सम्पन्न नेपाल मेडिकल कलेजमा चिकित्सक माग नेपाल मेडिकल कलेजमा पहिलाे पटक एन्डोस्कोपिक कम्बाइन्ड इन्ट्रारेनल सर्जरीबाट निकालियाे मिर्गाैलाकाे पत्थरी सुरक्षित गर्भपतनको सेवा सम्बन्धी कानुनलाई आवश्यक संशोधन गरिनुपर्छ प्रदेश अस्पताल पचास शय्यामा स्तरोन्नति गरिँदै भारतबाट फर्किनेमा कोरोना सङ्क्रमण, पर्याप्त कीट नहुँदा परीक्षणमा समस्या सुत्केरीको मृत्युपछि आफन्त आन्दोलित इकेबा डेन्टल क्लिनिकमा निशुल्क दन्त परिक्षणसेवा गौर प्रादेशिक अस्पतालको टोली हैजा फैलिएको क्षेत्रमा परिचालित सकारात्मक प्रभावको एक दशक: ‘एक एक पाइला’को अभियान १०औँ वर्षमा प्रवेश ‘जेनजी’ आन्दोलनमा मृत्यु हुनेको सङ्ख्या ३४ पुग्यो, एक हजार बढी घाइते ग्रामीण अस्पतालमा जटिल प्रसूति सेवा मानसिक स्वास्थ्य बिना समग्र सुस्वास्थ्य सम्भव छैन भन्ने नारा सहित एक दिने सेमिनार सम्पन्न मुटुरोग उपचार शिविरमा साढे चार सयको निःशुल्क परीक्षण ‘खल्ती’का सह-संस्थापक’ अधिकारीले गरे ‘सनफ्लावर इन्स्टिच्युट फर अटिजम’ को औपचारिक घोषणा