तीन प्याकेजमा एकसाथ काम, तनहुँ जलविद्युत् आयोजनाले लियो गति

ललितपुर – तनहुँ जिल्लामा निर्माणाधीन १४० मेगावाट क्षमताको तनहुँ जलविद्युत् आयोजनाको काम तीव्र गतिमा अघि बढिरहेको छ। ऋषिङ गाउँपालिका–१ मा रहेको यस आयोजनामा तीनवटै प्याकेजअन्तर्गतका काम एकसाथ अगाडि बढाइएका छन् ।

आयोजना प्रमुख श्यामजी भण्डारीका अनुसार प्याकेज–१ अन्तर्गत बाँध तथा हेडवर्क्स संरचनाको काम भइरहेको छ, प्याकेज–२ मा मुख्य सुरुङ, विद्युत्गृह र उपकरण जडानको काम जारी छ भने प्याकेज–३ अन्तर्गत दमौली–भरतपुर २२० केभी प्रसारण लाइन निर्माण भइरहेको छ ।

प्याकेज–१ को काम सोङ्दा कालिका जेभीले गरिरहेको छ, जसमा हालसम्म ४७ प्रतिशत प्रगति भएको छ । यस प्याकेजअन्तर्गत डाँडा कटान, पहुँच सडक, सेती नदीको धार परिवर्तन, अस्थायी बाँध तथा डाइभर्सन सुरुङ निर्माण सम्पन्न भइसकेको छ । सेती नदीलाई विसं २०८० कात्तिक २० गते पथान्तरण गरिएको थियो भने २०८१ जेठमा अस्थायी बाँध निर्माण पूरा भएको छ । हाल १४० मिटर अग्लो मुख्य बाँधको कङ्क्रिटिङ, ग्राउटिङ र कोर ड्रिलिङको काम जारी छ ।

प्याकेज–२ अन्तर्गतको काम चीनको सिनो हाइड्रो कर्पोरेसनले गरिरहेको छ । भूमिगत संरचना खन्ने कार्य सकिएको छ र विद्युत्गृह, सर्च ट्याङ्क, केवल सुरुङ तथा टेलरेसजस्ता संरचनाको मुख्य सिभिल काम पूरा भइसकेको छ। यस प्याकेजको समग्र प्रगति ७२.५ प्रतिशत पुगेको छ । हाल इलेक्ट्रोमेकानिकल कार्य, छाना जडान र पानी निकाससम्बन्धी काम भइरहेका छन् ।

त्यसैगरी प्याकेज–३ अन्तर्गत केइसी इन्टरनेशनल लिमिटेड (भारत) ले दमौली–भरतपुर ३३ किलोमिटर लामो २२० केभी प्रसारण लाइन निर्माण गरिरहेको छ। ९४ टावरमध्ये ७८ वटाको जग हाल्ने काम सम्पन्न भइसकेको छ र यस प्याकेजको प्रगति ७४.५ प्रतिशत रहेको छ। वन क्षेत्र प्रयोग र रुख कटानका लागि सम्बन्धित मन्त्रालयसँग समन्वय भइरहेको छ ।

आयोजनाको कुल लागत (प्रसारण लाइन, ग्रामीण विद्युतीकरण र निर्माण अवधिको ब्याजसहित) ५० करोड ५० लाख अमेरिकी डलर रहेको छ। यसमध्ये एडीबीले १५ करोड, जाइका १८ करोड ४० लाख, युरोपियन लगानी बैंकले आठ करोड ५० लाख र नेपाल सरकार तथा नेपाल विद्युत् प्राधिकरणले आठ करोड ६० लाख अमेरिकी डलर व्यहोर्ने गरी वित्तीय व्यवस्थापन गरिएको छ ।

थप समाचारहरु

मर्स्याङ्दी जलविद्युत् केन्द्रको उत्पादन घट्यो वर्षान्त २०८१ः गतिमा ऊर्जा क्षेत्र लमजुङमा १७ आयोजनाबाट विद्युत् उत्पादन माथिल्लो म्याग्दी–१ जलविद्युत् आयोजना निर्माण धमाधम अझै सम्पन्न भएन १३२ केभीको बुर्तिबाङ सबस्टेशन माथिल्लो सेती जलविद्युत्मा कुमारी बैङ्कको अगुवाईमा वित्तीय व्यवस्थापन मध्यकालीगण्डकी जलविद्युत् आयोजना निर्माण सुरु पोखरा महानगरपालिकाद्वारा १ अर्ब ३३ करोड अनुमानित लागत रहेको नगर ऊर्जा योजना सार्वजनिक मन्त्री घिसिङले आफ्नो सेवा सुविधा सहिद परिवारलाई प्रदान गर्ने कात्तिकभित्र १७ डेडिकेटेड फिडर तथा ट्रंकलाइनको बक्यौता बुझाउन २१ दिने अल्टिमेटम लामो समयदेखि प्रभावित प्रसारण लाइन निर्माण सुरु जलविद्युत् आयोजनाको विद्युत् खरिदको प्रतिस्पर्धी दर तय गरौँः मन्त्री घिसिङ हुम्लामा बन्ने भयो ३३५ मेगावाट क्षमताको हुम्ला कर्णाली दोस्रो जलविद्युत् आयोजना हितेन्द्रदेव शाक्यको रिटमा अन्तरिम आदेश दिन अस्वीकार हिमालय ऊर्जा विकास कम्पनी लिमिटेडको पच्चिसौं वार्षिक साधारण सभा सम्पन्न मुदीखोला जलविद्युत् आयोजनाको पहुँचमार्ग निर्माण सुरु पोखरामा विद्युत् तार भूमिगतको काम ६५ प्रतिशत सकियो बूढीगण्डकी आयोजनामा निजी क्षेत्र लगानी गर्न तयार छः अध्यक्ष ढकाल