सरकारद्वारा वैदेशिक रोजगारी स्वीकृतिमा नयाँ सुधार, टोकन प्रणाली समाप्त

बिजनेस पाटी

२०८२ चैत्र १६

306 views

सरकारले वैदेशिक रोजगारीका लागि श्रम स्वीकृतिमा टोकन प्रणाली समाप्त गरी आवेदन दिएको दिनमै स्वीकृति प्रदान गर्ने निर्णय गरेको छ । यसअघि टोकन लिएर तोकिएको दिनमा मात्र स्वीकृति मिल्ने व्यवस्था थियो ।

बैठकमा श्रम, रोजगार तथा सामाजिक सुरक्षा मन्त्री दीपककुमार साहको उपस्थितिमा निर्णय गरि, आवेदन प्रक्रिया सहज र छिटो बनाउने योजना तय भएको मन्त्रालयले जनाएको छ । त्यसैगरी, पूर्वप्रस्थान अभिमूखीकरण तालिम डिजिटल माध्यममार्फत उपलब्ध गराइने, तालिम पूर्ण रूपमा अनलाइन प्रणालीमा आधारित हुने व्यवस्था हुने छ ।

बैठकले सामाजिक सुरक्षा कोषमा सबै श्रमिक आवद्ध गर्ने अभियान, न्यूनतम ज्यालाको पूर्ण कार्यान्वयन, श्रमाधान कल सेन्टरको प्रभावकारिता वृद्धि, उद्योगमा जोखिम मूल्याङ्कन, उत्पादन र उद्यमशीलता प्रवर्द्धन, र पाँच देशसँग द्विपक्षीय श्रम सम्झौता विस्तार गर्ने निर्णय पनि गरेको छ ।

साथै, वैदेशिक रोजगारीमा नेपालीको सुरक्षा, कार्यस्थल सुरक्षा, स्वास्थ्य सुरक्षा, न्यूनतम मापदण्ड निर्माण, सीप विकास तालिम र रोजगार प्रवर्द्धन सम्बन्धी योजना पनि छलफलमा परेको छ ।

मन्त्रालयले सबै प्रदेशमा निजी क्षेत्रसँग सहकार्यमा सीप मेला सञ्चालन, आन्तरिक रोजगारी प्रवर्द्धन, सेवाग्राहीमैत्री सेवा प्रवाह, र वैदेशिक रोजगारीको नाममा हुने ठगी नियन्त्रणमा प्रभावकारी कदम चाल्ने तयारी गरेको छ ।

थप समाचारहरु

फेसबुकबाट तपाईको प्रतिक्रिया