जेठ १२ मा सलमान नेपाल आउने

काठमाडौं २७ चैत्र ।

बलिउड सुपरस्टार सलमान खानको नेपाल टुरको मिति फाइनल गरिएको छ । सलमानलाई जोधपुर कोर्टले धरौटीमा रिहा गरेलगत्तै उनको नेपाल दबंग टुरको मिति घोषणा गरिएकोे हो । आयोजक संस्था ओडिसीका अनुसार अब सलमान जेठको १२ गते आउनेछन् ।

जेलबाट छुटेको केही घण्टामा नै आयोजकले एक पत्रमार्फत् दबंग टुरको भारतस्थित अफिसियल इभेन्ट म्यानेजमेन्ट कम्पनी जेए इभेन्ट्सले सलमानको नेपाल कन्सर्टको मिति सार्वजनिक गरेको छ । पत्रमा उनको नेपाल कन्सर्ट वर्ष २०७५ को शनिबार जेठ १२ गते उल्लेख छ । उक्त पत्र ओडिसीले आफ्नो आधिकारिक फेसबुक पेजमा पनि राखेको छ । कार्यक्रममा सलमानसँगै नायिका सोनाक्षी सिंहा, कृति सेनन, कोरियोग्राफर तथा चर्चित अभिनेता प्रभु देवा, डेजी शाह, मिट ब्रदर, मनिष पावलको प्रस्तुति रहनेछ ।

जोधपुरको अदालतले ५ वर्षको जेल सजाय सुनाएपछि सलमानको वैशाख पहिलो साता हुने भनिएको नेपाल टुर अन्योलमा परेको थियो । अब नेपालको आयोजक संस्थाले ‘दबंग द टूर नेपाल’ का लागि टिकट बिक्री फेरि सुरु गरेको छ । यसअघि नेत्रविक्रम चन्द विप्लव नेतृत्वको नेपाल कम्युनिस्ट पार्टीले धम्की दिएपछि सुरक्षाको कारण देखाउँदै आयोजक ओडिसी इन्टरटेन्मेन्टले फागुन २६ गतेको ‘द दबंग टुर’ कार्यक्रम तत्काललाई स्थगित गरेको थियो ।