दुई जहाज उडाउन तीन पाइलट !

काठमाडौं, १९ फागुन ।

राष्ट्रिय ध्वजावाहक नेपाल वायुसेवा निगमसँग आन्तरिक उडान गर्न १७ सिट क्षमताका दुई थान चिनीयाँ जहाज छन्। तर तीनलाई उडाउन निगमसँग जम्मा तीन पाइलट छन् ।

आजको नागरिक दैनिकमा खबर छ– थप अचम्म केहो भने, तीन पाइलट लिएर दुइटा जहाजबाट सातामा २८ उडान गर्ने तालिका निगमले बनाएको छ। त्यसमाथि तीनमध्ये जहाज कमान्ड गर्ने क्याप्टेन एक जना मात्र छन् भने बाँकी दुई को–पाइलट हुन् ।

यस हिसाबले एक दिनमा दुई जहाजबाट चार उडान हुनेछन्। एउटा जहाजले दुई उडान गर्नेछ। अब एउटा क्याप्टेन र दुई को–पाइलटले एकैचोटी चार उडान गर्ने असम्भव तालिका बनाइएको छ। एउटा जहाज उडाउन एक जना क्याप्टेन र एकजना को–पाइलट चाहिन्छ ।

मुलुकको उड्डयन क्षेत्रको नयामक निकाय नेपाल नागरिक उड्डयन प्राधिकरणको नियमअनुसार आन्तिरिक उडान गर्ने निगमको एक थान साना जहाज उडाउन क्याप्टेन र को–पाइलट गरी पाँच जना चाहिन्छ। यसको अर्थ दुई क्याप्टेन र तीन को–पाइलट वा तीन क्याप्टेन र दुई को–पाइलट हुनुपर्छ भन्ने हो ।

‘तीन पाइलटबाट दुइटा जहाज उडाउन असम्भव काम गर्ने निर्णय निगमले गरेको छ’, निगमकै वरिष्ठ पाइलटले भने, ‘एउटा क्याप्टेनले दुइटा जहाज सँगसँगै कसरी उडाउन सक्छ ? यसको अर्थ के हो भने दुई जहाज कहिल्यै सँगै उड्न सक्दैनन् र यो थाहा हुँदाहुँदै पनि दुइटै जहाजको उडान तालिका बनाइयो ।’