नेपाल बैंकको ब्राण्ड एम्बेस्डरमा महाविर पुन

काठमाडौँ, २० फागुन,२०७६ ।

नेपाल बैंक लिमिटेडले राष्ट्रिय आविष्कार केन्द्र नेपालका अध्यक्ष डा महावीर पुनलाई ब्राण्ड एम्बेस्डरमा नियुक्त गरेको छ।

नविनतम सोच विचार राख्ने युवाहरुलाई उद्यमी बन्न र आर्थिक विकासमा योगदान दिन लागि परेका डा पुनलाई बैंकले ब्राण्ड एम्बेस्डरमा नियुक्त गरेको हो।

आविष्कार केन्द्रको कार्यालय कीर्तिपुरमा सोमबार आयोजित एक समारोहमा ब्राण्ड एम्बेस्डर नियुक्ति सम्झौतामा बैंकका प्रमुख कार्यकारी अधिकृत कृष्णबहादुर अधिकारी र केन्द्रका अध्यक्ष पुनले हस्ताक्षर गरे । हस्ताक्षरपछि प्रमुख कार्यकारी अधिकृत अधिकारीले पुनलाई बधाई दिँदै आविष्कार केन्द्र स्थापना गरेर युवालाई उद्यमी बन्न प्रेरित गरिरहेका व्यक्तिलाई ब्राण्ड एम्बेस्डर नियुक्त गर्न पाउनु गर्वको विषय भएको बताउँदै नेपाल बैंक हातेमालो गर्दै समृद्धिका लागि योगदान दिन तयार रहेको बताए।

पुनले सबैभन्दा जेठो बैंकको ब्राण्ड एम्बेस्डर बन्नु पाउनु आफ्ना लागि सौभाग्य भएको बताए। साथै देशको समृद्धिका लागि अगाडि बढ्ने मौका आएको भन्दै बैंकको प्रगतिका लागि सक्दो सहयोग गर्ने प्रतिवद्धता व्यक्त गरे।

केन्द्रले ड्रोन, कृषि, शिक्षा, स्वास्थ्य, बायोमेडिकल,  लगायतका २० वटा क्षेत्रमा अनुसन्धानको काम गरिरहेका छ। वायरलेस प्रविधिद्वारा देशको ग्रामिण क्षेत्रमा सूचना प्रबाह गर्ने लक्ष्य बोकेर नेपाल वायरलेस सञ्जाल परियोजनामार्फत इन्टरनेट सञ्जाल विस्तार गर्न सफल व्यक्तित्व महावीर पुन म्याग्दी जिल्लाको नांगी गाउँमा जन्मिएका हुन्। उनले एसियाको नोबेल पुरस्कारले चिनिने ‘रोमन मेग्यासेसे अवार्ड’ जस्ता महत्वपूर्ण सम्मानहरु पाएका छन्।

बैंकमा नेपाल सरकारको ५१ प्रतिशत र निजी क्षेत्रको ४९ प्रतिशत शेयर हिस्सा कायम रहेको छ।

बैंकले देशको ६३ जिल्लामा रहेका १७८ वटा शाखाहरु, २६ बटा एक्स्टेन्सन काउण्टर तथा ११९ बटा एटिएम मार्फत बैंकिङ्ग सेवा दिँदैआएको छ र आगामी आ.ब. भित्र सबै जिल्लाहरुमा शाखा सञ्जाल पुर्याउने लक्ष्यका साथ कार्यहरु अगाडी बढाईरहेको छ।