महंगीलाई चुनौती, रु पाँचमै उपचार!

सिमरा १७ माघ

बाराको केन्द्रका रूपमा रहेको सिमरा स्वास्थ्य केन्द्रमा ५ रुपैयाँ शुल्कले दक्ष चिकित्सकबाट उपचार हुने थालेपछि स्थानीय आकर्षित भएका छन्। ‘नागरिकको अधिकार सुलभ उपचार’को अभियानस्वरूप केन्द्रले आधुनिक प्रविधि र दक्ष चिकित्सकबाट उपचार थालेपछि नजिकै रहेका निजी अस्पतालका बिरामीको समेत सिमरा पीएचसी सिमरामा भीड लाग्ने गरेको छ। जटिल र ठूला रोगका बिरामीबाहेक अन्य सेवाग्राहीले स्वास्थ्य केन्द्रमा नै सेवा लिन थालेपछि निजी अस्पतालको शाख सिमरामा घटेको छ।

स्वास्थ्य केन्द्रमा कार्यरत चिकित्सकको क्षमता बराबरको निजी अस्पतालमा उपचार गराउँदा ३ देखि ५ सयसम्म प्रतिव्यक्ति शुल्क र औषधिसमेत खरिद गर्नुपर्ने तर स्वास्थ्य केन्द्रमा ५ रुपैयाँमा उपचारसहितको निःशुल्क औषधि पाउन थालेसँगै यहाँका बिरामी सानाठूला समस्या बोकेर स्वास्थ्य केन्द्र नै धाउन थालेका छन्। केन्द्रमा सरकारले उपलब्ध गराएका ५८ प्रकारका औषधि निःशुल्क र ४८ प्रकारकार ल्याब परीक्षण निजी अस्पतालभन्दा ५० प्रतिशत सस्तो दरमा परीक्षण भएपछि ग्रामीण क्षेत्र मात्र नभई बजारका सामान्यदेखि सम्पन्न वर्गका मानिसहरूले समेत सबैखाले सेवा यहाँबाट लिन थालेका छन्।
राजधानी दैनिकबाट