रियलले गर्‍यो बार्सिलोनासँगको रेकर्डको बराबरी

एजेन्सी ३ असोज

रियल मड्रिडले ला लिगाको गयराति सम्पन्न खेलमा इस्पानियोललाई पराजित गर्दै लगातार १६ औँ जित दर्ता गरेको छ। यससँगै रियलले स्पेनको ठूला लिग डिभिजनमा लगातार १६ औँ जितको बार्सिलोनाको रेकर्डसँग बराबरी गरेको छ।  इस्पानियोलको घरेलु मैदानमा ग्यारेथ बेल र क्रिस्टियानो रोनाल्डोको अनुपस्थितिमा पनि उच्च प्रदर्शन गर्दै इस्पानियोललाई २-० गोलअन्तरले पराजित गर्न सफल रह्यो। रियलको यो लिगमा लगातार चौथो जित पनि हो।

जितसँगै रियल अंकतालिकाको शीर्ष स्थानमा उक्लिएको छ। १ खेलमा पराजय बेहोरेको बार्सिलोना दोस्रो स्थानमा झरेको छ।  पहिलो हाफको अन्तिम मिनेटमा जेम्स रोड्रिगेजले गोल गर्दै टोलीलाई अग्रता दिलाएका थिए। यसपछि खेलको ७१ औँ मिनेटमा करिम बेन्जिमाले गोल गर्दै रियललाई २-० को अग्रता दिलाए। त्यसपछि थप गोल हुन सकेन र खेल रियलले २-० ले जित्न सफल भयो।  यसैगरी ला लिगाका अन्य खेलमा भिल्लारियलले रियल सोसिडाडलाई २-१ गोलअन्तरले, एथ्लेटिको बिल्बाओले भ्यालेन्सियालाई २-१ गोलअन्तरले पराजित गरेका थिए भने सेल्टा भिगो र ओसासुनाबीचको खेल गोलरहित बराबरीमा टुङ्गिएको थियो।