सौरभ चौधरीद्धारा निर्देशित ‘लभ डायरिज’ को टिजर सार्वजनिक (भिडियो सहित)

काठमाडौं – १ माघ ।

भ्यालेटाइन डेको अवसर पारेर फागुन २ गते रिलिज हुने फिल्म ‘लभ डायरिज’को टिजर सार्वजनिक गरिएको छ । नवनिर्देशक सौरभ चौधरीद्धारा निर्देशित फिल्मको टिजरमा मुख्य कलाकार सुशील श्रेष्ठ र रुबिना थापालाई प्राथमिकताका साथ स्थान दिइएको छ ।

यी  दुई बीचको प्रेम, रोमान्स र विछोडका दृश्य फिल्म टिजरमा अटाएका छन् । फिल्मले यस वर्षको भ्यालेटाइन डेमा दर्शकलाई प्रेम बाँड्नेछ । विनोद सापकोटाले निर्माण गरेको सिनेमामा सुशील र रुबिनासँगै विश्वजित रिमालको पनि मुख्य भूमिका छ । फिल्मको कथा र पटकथा मधु बास्तोलाले लेखेका हुन् ।

शाहील खान सह-निर्देशक रहेको फिल्ममा संजय लामाको छायांकन, मिलन श्रेष्ठ र दिर्घ खड्काको सम्पादन र  अर्जुन पोखरेलको संगीत रहेको छ । यसअघि फिल्मका दुई गीत सार्वजनिक भैसकेका छन् । जसलाई दर्शक तथा श्रोताले निकै रुचाएका छन् ।